រដ្ឋមន្ត្រីការបរទេសទួរគី លោក Hakan Fidan បានអំពាវនាវឱ្យមានដំណាក់កាលទី២ នៃកិច្ចព្រមព្រៀងបទឈប់បាញ់នៅតំបន់ហ្គាហ្សាចាប់ផ្តើមឱ្យបានឆាប់រហ័ស ខណៈដែលការរំលោភបំពានលើបទឈប់បាញ់នៅតែបន្តកើតមាន និងគំរាមកំហែងដល់ស្ថិរភាពក្នុងតំបន់។
ប្រភពពីសារព័ត៌មានAnadolu Agency នៅថ្ងៃទី18 ខែធ្នូ ឆ្នាំ2025។
ថ្លែងក្នុងបទសម្ភាសន៍ជាមួយសារព័ត៌មាន TRT World លោក Fidan បានបញ្ជាក់ថា ដំណាក់កាលទី២ នឹងរួមមានការដាក់ពង្រាយកម្លាំងស្ថិរភាពអន្តរជាតិ ការបង្កើតក្រុមប្រឹក្សាសន្តិភាព និងយន្តការអភិបាលកិច្ច ដើម្បីគ្រប់គ្រងស្ថានភាពប្រចាំថ្ងៃនៅហ្គាហ្សា។ លោកបានបន្ថែមថា ប្រទេសទួរគីកំពុងតាមដានស្ថានការណ៍យ៉ាងដិតដល់ និងជឿជាក់ថា លទ្ធផលបឋមអាចនឹងបង្ហាញក្នុងរយៈពេលប៉ុន្មានសប្តាហ៍ខាងមុខ។
លោក Fidan បានព្រមានថា ប្រសិនបើដំណើរការនេះបរាជ័យ អំពើហិង្សាអាចវិលត្រឡប់មកវិញក្នុងទម្រង់ដ៏ធ្ងន់ធ្ងរ និងអាចរាលដាលទៅតំបន់ផ្សេងៗ រួមទាំងវេស្តប៊ែងផងដែរ។ លោកបានសង្កត់ធ្ងន់ថា បទឈប់បាញ់មានសារៈសំខាន់យ៉ាងខ្លាំង ប៉ុន្តែការរំលោភបំពាននៅតែបន្ត ដោយបញ្ជាក់ថា ចាប់តាំងពីការប្រកាសបទឈប់បាញ់ ជនជាតិប៉ាឡេស្ទីនជិត ៤០០ នាក់ត្រូវបានសម្លាប់៕