នៅថ្ងៃទី 29 ខែធ្នូ ឆ្នាំ 2025 ប្រទេសចិន បានចាប់ផ្តើមសមយុទ្ធយោធាបាញ់គ្រាប់ជុំវិញកោះតៃវ៉ាន់ ដោយដាក់ពង្រាយកងទ័ពអាកាស កងទ័ពជើងទឹក និងកងទ័ពរ៉ុក្កែត។ យោធាចិនបានអះអាងថា សមយុទ្ធនេះមានគោលបំណងសាកល្បងការត្រៀមខ្លួនប្រយុទ្ធ និងផ្តល់ការព្រមានយ៉ាងម៉ឺងម៉ាត់ចំពោះកងកម្លាំងដែលខ្លួនហៅថាបំបែកខ្លួននិង ការជ្រៀតជ្រែកពីខាងក្រៅ។
ប្រភពពីសារព័ត៌មានAl Jazeera។
បញ្ជាការដ្ឋានភាគខាងកើតនៃកងទ័ពរំដោះប្រជាជនចិន (PLA) បានឲ្យដឹងថា សមយុទ្ធដែលមានឈ្មោះ Just Mission 2025 រួមមានការបាញ់ប្រហារផ្ទាល់ និងការធ្វើត្រាប់តាមការវាយប្រហារលើគោលដៅដីគោក និងសមុទ្រ ព្រមទាំងការបិទច្រកសំខាន់ៗ និងឡោមព័ទ្ធកោះតៃវ៉ាន់។ សមយុទ្ធនេះត្រូវគ្រោងបន្តដល់ថ្ងៃអង្គារ។
ការធ្វើសមយុទ្ធបានជំរុញឱ្យតៃវ៉ាន់ប្រញាប់ប្រញាល់ដាក់ពង្រាយទាហាន និងសម្ភារៈការពារ ខណៈយន្តហោះចម្បាំង Mirage 2000 ត្រូវបានបញ្ជាឲ្យហោះឡើងពីមូលដ្ឋានទ័ពអាកាស Hsinchu។ អាជ្ញាធរតៃវ៉ាន់បាននិយាយថា ខ្លួនបានរកឃើញនាវាចិនជាច្រើនគ្រឿងនៅជិតដែនទឹកកោះ៕