មេដឹកនាំកូរ៉េខាងជើងលោក គីម ជុងអ៊ុន បានធ្វើទស្សនកិច្ចចុះត្រួតពិនិត្យ រោងចក្រមួយដែលកំពុងផលិតប្រព័ន្ធបាញ់គ្រាប់រ៉ុក្កែតចម្រុះ ដែលលោកអួតថា អាចវាយប្រហារលើកូរ៉េខាងត្បូង និងមានសមត្ថភាពកម្ទេចសត្រូវ។
ប្រភពពីសារព័ត៌មាន AFP នៅថ្ងៃទី៣០ខែធ្នូ.!។
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានឱ្យដឹងថា លោក គីម ជុងអ៊ុន បានចាត់ទុកប្រព័ន្ធបាញ់គ្រាប់រ៉ុក្កែតស៊េរីថ្មីរបស់កូរ៉េខាងជើង។
គឺជាកំពូលអាវុធដ៏មានថាមពល ដែលអាចកម្ទេចសត្រូវជាមួយការវាយប្រហារចំគោលដៅជាក់លាក់កម្រិតខ្ពស់បំផុត និងអាចបង្កបំផ្លិចបំផ្លាញធ្ងន់ធ្ងរ។
តាម KCNA ប្រព័ន្ធបាញ់គ្រាប់រ៉ុក្កែតចម្រុះថ្មីនេះ អាចនឹងត្រូវបានប្រើប្រាស់នៅក្នុងបរិមាណដ៏ច្រើនសម្រាប់ការវាយប្រហារសង្រ្គប់នៅក្នុងប្រតិបត្តិការយោធាណាមួយ។
ដំណើរទស្សនកិច្ចរបស់លោក គីម ទៅកាន់រោងចក្រផលិតប្រព័ន្ធបាញ់គ្រាប់រ៉ុក្កែតចម្រុះ ធ្វើឡើងតែមួយថ្ងៃប៉ុណ្ណោះ បន្ទាប់ពីប្រព័ន្ធផ្សព្វផ្សាយកូរ៉េខាងជើងរាយការណ៍ថាទីក្រុងព្យុងយ៉ាង បានបាញ់សាកល្បងមីស៊ីលរយៈចម្ងាយឆ្ងាយ២គ្រាប់ ជាការត្រៀមលក្ខណៈប្រយុទ្ធប្រឆាំងនឹងការគំរាមកំហែងពីខាងក្រៅ៕