រុស្ស៊ី បើកការវាយប្រហារលើហេដ្ឋារចនាសម្ព័ន្ធ នៅក្នុងតំបន់អូដេសា (Odesa) របស់អ៊ុយក្រែន កាលពីថ្ងៃអង្គារទី៣០ខែធ្នូ ។
ដោយបានធ្វើឱ្យខូចខាតដល់កប៉ាល់ស៊ីវិលចំនួន១គ្រឿង និងនៅកំពង់ផែសមុទ្រខ្មៅ Pivdennyi និង Chornomorsk។
ប្រភពពីសារព័ត៌មាន Reuters ។
ឧបនាយករដ្ឋមន្ត្រីអ៊ុយក្រែន លោក អូឡេកស៊ី គូលេបា (Oleksiy Kuleba) បានបញ្ជាក់ថា កប៉ាល់ដោតទង់ជាតិប៉ាណាម៉ាដែលផ្ទុកគ្រាប់ធញ្ញជាតិ និងធុងស្តុកប្រេងជាច្រើនត្រូវបានរងការវាយប្រហារ ហើយមនុស្សម្នាក់បានរងរបួស។
លោកថ្លែងថា នេះគឺជាការវាយប្រហារដោយចេតនារបស់រុស្ស៊ី លើហេដ្ឋារចនាសម្ព័ន្ធកំពង់ផែស៊ីវិល។
លោកបានបន្ថែមថា កំពង់ផែទាំងពីរនៅតែបន្តដំណើរការជាធម្មតា។
ក្នុងរយៈពេលប៉ុន្មានខែថ្មីៗ សង្គ្រាមផ្លូវសមុទ្ររវាងអ៊ុយក្រែននិងរុស្ស៊ី បានកើនឡើងកម្តៅយ៉ាងខ្លាំង ដោយភាគីទាំងពីរ បានវាយប្រហារលើទ្រព្យសម្បត្តិផ្លូវទឹករបស់គ្នាទៅវិញទៅមក៕