ឆ្នាំ២០២៥ ត្រូវបានការិយាល័យស្ថិតិកណ្តាលប៉ាឡេស្ទីនពិពណ៌នាថា ជាឆ្នាំមនុស្សធម៌ និងប្រជាសាស្ត្រអាក្រក់បំផុតសម្រាប់ប្រជាជនប៉ាឡេស្ទីន ដោយសារសង្គ្រាម និងការវាយប្រហារបន្តបន្ទាប់របស់អ៊ីស្រាអែលលើតំបន់ហ្គាហ្សា និងការកើនឡើងអំពើហិង្សានៅតំបន់វេស្តប៊ែង រួមទាំងក្រុងយេរូសាឡឹមខាងកើត។
ប្រភពពីសារព័ត៌មានAnadolu Agencyនៅថ្ងៃទី១ខែធ្នូ។
ចាប់តាំងពីខែតុលា ឆ្នាំ២០២៣ មកប្រជាជនប៉ាឡេស្ទីនជាង ៧២.០០០ នាក់ត្រូវបានសម្លាប់ ដែលភាគច្រើនកើតឡើងនៅហ្គាហ្សា រួមមានកុមារ និងស្ត្រីរាប់ម៉ឺននាក់ ខណៈដែលអ្នករងរបួសមានជាង ១៧១.០០០ នាក់ និងមនុស្សប្រហែល ១១.០០០ នាក់នៅតែបាត់ខ្លួន។ សង្គ្រាមបានបណ្តាលឱ្យមានការផ្លាស់ទីលំនៅយ៉ាងធំ ដោយប្រជាជនជិតពីរលាននាក់ត្រូវចាកចេញពីផ្ទះរបស់ខ្លួន។
ផលប៉ះពាល់ប្រជាសាស្ត្រមានភាពធ្ងន់ធ្ងរ ដោយចំនួនប្រជាជនហ្គាហ្សាបានធ្លាក់ចុះប្រហែល ២៥៤.០០០ នាក់ ឬ ១០,៦% បើប្រៀបធៀបទៅនឹងមុនសង្គ្រាម។ ប្រព័ន្ធសុខាភិបាលនៅហ្គាហ្សាស្ទើរតែដួលរលំទាំងស្រុង ដោយមណ្ឌលសុខភាព និងមន្ទីរពេទ្យភាគច្រើនត្រូវបានបំផ្លាញ ឬដំណើរការដោយសមត្ថភាពកំណត់ ខណៈដែលប្រជាជនរាប់សែននាក់ ជាពិសេសស្ត្រីមានផ្ទៃពោះ ប្រឈមមុខនឹងហានិភ័យសុខភាពធ្ងន់ធ្ងរ៕