ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ បានឆ្លើយនឹងសំណួរជុំវិញសេចក្ដីរាយការណ៍ អំពីការវាយប្រហាររបស់អាមេរិក លើកំពង់ផែមួយនៅក្នុង ប្រទេសវ៉េណេស៊ុយអេឡា.ដោយលោក និយាយថា វ៉េណេស៊ុយអេឡា បើកចំហជានិច្ច សម្រាប់កិច្ចសន្ទនាជាមួយអាមេរិក។
ប្រភពពីសារព័ត៌មាន AFP។
ក្នុងបទសម្ភាសន៍តាមកញ្ចក់ទូរទស្សន៍រដ្ឋ កាលពីថ្ងៃព្រហស្បតិ៍ ទី១ ខែមករា លោក ម៉ាឌូរ៉ូ ចង់សំដៅលើគំនិត នៃកិច្ចសន្ទនាជាមួយសហរដ្ឋអាមេរិក ស្ដីពីការរត់ពន្ធគ្រឿងញៀន ប្រេង និងអន្តោប្រវេសន៍ បាននិយាយថា រូបលោកបើកចំហចំពោះកិច្ចសន្ទនាជាមួយសហរដ្ឋអាមេរិក មិនថានៅទីណា ឬនៅពេលណានោះទេឱ្យតែសហរដ្ឋអាមេរិកចង់។
លោក ម៉ាឌូរ៉ូ មិនបានទទួលស្គាល់ការវាយប្រហារណាមួយ របស់សហរដ្ឋអាមេរិក លើកំពង់ផែមួយនៅក្នុងប្រទេសរបស់លោកនោះទេ។
នៅពេលត្រូវបានសាកសួរត្រង់ៗ ថាតើលោកទទួលស្គាល់ ឬបដិសេធ ការវាយប្រហារនេះ លោក ម៉ាឌូរ៉ូ មិនបានឆ្លើយចំនឹងសំណួរនោះទេ ដោយនិយាយថានេះអាចជាអ្វីដែលយើងអាចនឹងជជែកគ្នានៅប៉ុន្មានថ្ងៃខាងមុខ។
ការវាយប្រហារលើកំពង់ផែវ៉េណេស៊ុយអេឡានឹងក្លាយជាវាយប្រហារ លើដីគោកលើកដំបូងបំផុត របស់សហរដ្ឋអាមេរិក ក្នុងយុទ្ធនាការប្រឆាំងនឹងការរត់ពន្ធ គ្រឿងញៀននៅក្នុងតំបន់អាមេរិកឡាទីនចាប់តាំងពីដើមខែកញ្ញា ឆ្នាំ២០២៥មក។
លោក ត្រាំ កាលពីថ្ងៃចន្ទ បានអះអាងថាសហរដ្ឋអាមេរិក បានវាយប្រហារ និងកម្ទេចកំពង់ផែមួយកន្លែងដែល ត្រូវបានប្រើប្រាស់សម្រាប់ទូកដឹកគ្រឿងញៀនរបស់វ៉េណេស៊ុយអេឡា។
លោក ត្រាំ មិនបាននិយាយថា តើប្រតិបត្តិការនេះធ្វើឡើងដោយយោធាអាមេរិក ឬក៏ទីភ្នាក់ងារស៊ើបការណ៍សម្ងាត់ CIA ឡើយ៕