ប្រធានាធិបតីអាមេរិកលោក ដូណាល់ ត្រាំ កាលពីថ្ងៃទី៣១ ខែធ្នូ បាននិយាយថា អាមេរិក កំពុងដកកងទ័ពឆ្មាំជាតិចេញពីទីក្រុង Chicago Los Angeles និងទីក្រុង Portland។
លោក បានបន្ថែមថា កងកម្លាំងសហព័ន្ធអាចនឹងត្រូវបានដាក់ពង្រាយឡើងវិញ ប្រសិនបើអត្រាបទល្មើសឧក្រិដ្ឋកម្មកើនឡើងវិញ។
ប្រភពពីសារព័ត៌មាន Reuters។
បណ្ដាមេដឹកនាំមូលដ្ឋាន នៅតាមទីក្រុងខាងលើ និងក្រុមអ្នកប្រជាធិបតេយ្យបាននិយាយថា ការដាក់ពង្រាយកងទ័ពឆ្មាំជាតិគឺជាវិធានការមិនចាំបាច់ ហើយពួកគេបានចោទប្រកាន់រដ្ឋបាលលោក ត្រាំ បានបញ្ចេញ ប្រតិកម្មខ្លាំងហួសហេតុពេក និងនិយាយបំប៉ោងពីអំពើហិង្សាដើម្បីបញ្ជាក់ពីភាពត្រឹមត្រូវនៃការដាក់ពង្រាយកងទ័ព។
យ៉ាងណាក៏ដោយ លោក ត្រាំ បាននិយាយថាការដាក់ពង្រាយកងទ័ពឆ្មាំជាតិក្នុងទីក្រុង Los Angeles, Chicago, Washington, D.C. Memphis និងទីក្រុង Portland គឺជារឿងចាំបាច់ដើម្បីបង្រ្កាបបទឧក្រិដ្ឋកម្ម និងការពារទ្រព្យសម្បត្តិសហព័ន្ធ ព្រមទាំងបុគ្គលិកពីក្រុមបាតុករ។
តាមលោក ត្រាំ ការដកកងទ័ពឆ្មាំជាតិចេញពីទីក្រុង Chicago Los Angeles និងទីក្រុង Portland ធ្វើឡើងក្រោយបទឧក្រិដ្ឋកម្មបានធ្លាក់ចុះ។
លោកបញ្ជាក់ថា ការដាក់ពង្រាយកងទ័ពអាចនឹងត្រូវ ធ្វើឡើងវិញប្រសិនបើឧក្រិដ្ឋកម្មកើនឡើងនោះ៕