កងកម្លាំងអ៊ីស្រាអែលបានបើកការវាយប្រហារនៅតំបន់ហ្គាហ្សា បណ្ដាលឱ្យជនជាតិប៉ាឡេស្ទីនយ៉ាងហោចណាស់ ៤នាក់ស្លាប់ និងម្នាក់ទៀតបានស្លាប់ដោយសាររបួសពីការវាយប្រហារមុននេះ។
សារព័ត៌មានAl Jazeera នៅថ្ងៃទី៣ខែវិច្ឆិកា។
តាមប្រភពវេជ្ជសាស្ត្រ ការវាយប្រហារកាលពីថ្ងៃចន្ទ បានសម្លាប់មនុស្សយ៉ាងហោចណាស់ ២នាក់ នៅទីក្រុង Khan Younis ភាគខាងត្បូងហ្គាហ្សា និងម្នាក់ទៀតនៅភូមិ Al-Musaddar ភាគកណ្ដាល ដោយសារការវាយប្រហារដោយយន្តហោះគ្មានមនុស្សបើក។ ចំណែកមនុស្សម្នាក់ទៀតបានស្លាប់ក្នុងការវាយប្រហារលើយានយន្តមួយនៅតំបន់ Tal al-Hawa ក្នុងទីក្រុងហ្គាហ្សា ហើយមនុស្ស ៥នាក់ផ្សេងទៀតរងរបួស។
ជាមួយគ្នានេះ មនុស្សម្នាក់ទៀតឈ្មោះ Youssef Abu Younis បានស្លាប់ដោយសាររបួសពីការវាយប្រហារលើប៉ុស្តិ៍ប៉ូលិសនៅតំបន់ Al-Mawasi កាលពីថ្ងៃអាទិត្យ។ ការវាយប្រហារលើយានយន្តរបស់អង្គការផ្ដល់អាហារសហគមន៍នៅទីក្រុងហ្គាហ្សា ក៏បានបណ្ដាលឱ្យមនុស្ស ៣នាក់រងរបួសផងដែរ។
ក្រសួងសុខាភិបាលប៉ាឡេស្ទីនបានឱ្យដឹងថា ចាប់តាំងពីបទឈប់បាញ់ដែលសម្របសម្រួលដោយសហរដ្ឋអាមេរិក ចូលជាធរមានក្នុងខែតុលា ឆ្នាំ២០២៥ មក ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ១.៥៩៣នាក់ និងធ្វើឱ្យ ៥.៧៤៨នាក់រងរបួស។
ដោយឡែក ចាប់តាំងពីសង្គ្រាមនៅតំបន់ហ្គាហ្សាបានចាប់ផ្ដើមមក ចំនួនអ្នកស្លាប់បានកើនដល់យ៉ាងហោចណាស់ ៧៤.៦០៩នាក់ និងអ្នករងរបួស ១៧៥.៨៧២នាក់។ ការវាយប្រហារចុងក្រោយនេះកើតឡើង ខណៈដែលអាជ្ញាធរកំពុងព្យាយាមស្វែងរកទីជម្រកសម្រាប់ប្រជាជនភៀសខ្លួន មុនរដូវរងាចូលមកដល់៕
