កងកម្លាំងអ៊ីស្រាអែលបានធ្វើប្រតិបត្តិការឆ្មក់ចូលតំបន់វេសប៊ែង (West Bank) កាលពីថ្ងៃចន្ទ ដោយបណ្ដាលឱ្យជនជាតិប៉ាឡេស្ទីន ២នាក់រងរបួស ចាប់ខ្លួនយុវជនម្នាក់ និងបំផ្លាញវិមានរំឭកវិញ្ញាណក្ខន្ធជនជាតិប៉ាឡេស្ទីនដែលបានស្លាប់។
សារព័ត៌មានAnadolu Agency នៅថ្ងៃទី៣ខែវិច្ឆិកា។
តាមប្រភពព័ត៌មាន កងកម្លាំងអ៊ីស្រាអែលបានវាយដំជនជាតិប៉ាឡេស្ទីន ២នាក់ នៅតំបន់ Al-Minya ជិតទីក្រុង Bethlehem បណ្ដាលឱ្យពួកគេមានស្នាមជាំ និងត្រូវបានបញ្ជូនទៅមន្ទីរពេទ្យ។ ចំណែកនៅតំបន់ Kafr Dan ក្បែរទីក្រុង Jenin កងកម្លាំងអ៊ីស្រាអែលបានឆ្មក់ចូលផ្ទះ និងហាងមួយចំនួន រួចចាប់ខ្លួនយុវជនម្នាក់។
នៅភាគខាងត្បូងទីក្រុង Nablus កងទ័ពអ៊ីស្រាអែលបានប្រើគ្រឿងចក្រឈូសឆាយបំផ្លាញវិមានរំឭកដល់ជនជាតិប៉ាឡេស្ទីនដែលបានស្លាប់ ព្រមទាំងដកហូតផ្ទាំងបង្ហាញផែនទីប៉ាឡេស្ទីន និងដកដើមអូលីវចេញផងដែរ។ កងកម្លាំងក៏បានបិទផ្លូវចេញចូលភូមិមួយចំនួន និងរឹតត្បិតការធ្វើដំណើររបស់ប្រជាពលរដ្ឋ។
ជាមួយគ្នានេះ គណៈកម្មការប៉ាឡេស្ទីនទទួលបន្ទុកតាមដានការប្រឆាំងនឹងជញ្ជាំង និងការតាំងទីលំនៅ បានឱ្យដឹងថា ក្នុងខែតុលា ឆ្នាំ២០២៦ មានការវាយប្រហារសរុបចំនួន ៣.១៣៣លើក នៅតំបន់វេសប៊ែង កើនឡើង ៥២,៨% បើធៀបនឹងខែកញ្ញា។ ក្នុងនោះ ១.៧៦៤លើក បង្កឡើងដោយកងកម្លាំងអ៊ីស្រាអែល និង ១.៣៦៩លើក ដោយអ្នកតាំងទីលំនៅអ៊ីស្រាអែល៕
