មានសេចក្តីរាយការណ៍ថ្មីថា នៅថ្ងៃទី១៣ខែកញ្ញា នាវាមួយត្រូវបានវាយប្រហារនៅច្រកសមុទ្រHormuz បង្កការព្រួយបារម្ភថា សង្គ្រាមនៅមជ្ឈិមបូព៌ាអាចប៉ះពាល់កាន់តែខ្លាំងដល់ការផ្គត់ផ្គង់ប្រេង និងថាមពលពិភពលោក។
ប្រភពពីសារព័ត៌មានReuter។
ទីភ្នាក់ងារ UKMTO ដែលពាក់ព័ន្ធនឹងកងទ័ពជើងទឹកអង់គ្លេស បានឱ្យដឹងថា មានគ្រាប់មួយបានបុកនាវាដែលកំពុងធ្វើដំណើរឆ្លងកាត់ច្រកHormuz។ ប៉ុន្តែអាជ្ញាធរមិនទាន់ដឹងថា នាវារងការខូចខាតកម្រិតណា និងនាវិកមានសុវត្ថិភាពឬអត់ទេ។
នៅថ្ងៃមុន អារ៉ាប៊ីសាអូឌីតក៏បានបិទបណ្តោះអាសន្នបំពង់បង្ហូរប្រេង East-West បន្ទាប់ពីមានការវាយប្រហារដោយដ្រូន។ អារ៉ាប៊ីសាអូឌីត និងអ៊ីរ៉ាក់បាននិយាយថា ដ្រូននេះមានប្រភពមកពីអ៊ីរ៉ាក់ ជាទីដែលមានក្រុមប្រដាប់អាវុធដែលគាំទ្រដោយអ៊ីរ៉ង់។
បំពង់ប្រេង East-West មានប្រវែងប្រហែល ១,២០០ គីឡូម៉ែត្រ ហើយអាចដឹកប្រេងបានប្រហែល ៤–៥ លានបារ៉ែលក្នុងមួយថ្ងៃ ដែលស្មើប្រហែល ៤–៥% នៃការផ្គត់ផ្គង់ប្រេងពិភពលោក។
ការវាយប្រហារទាំងនេះកំពុងបង្កើនការព្រួយបារម្ភថា ប្រសិនបើស្ថានការណ៍នៅតែធ្ងន់ធ្ងរ ការផ្គត់ផ្គង់ប្រេងអាចរាំងស្ទះកាន់តែខ្លាំង ហើយ តម្លៃប្រេងពិភពលោកអាចឡើងថ្លៃបន្ថែមទៀត។ កាលពីសប្តាហ៍មុន តម្លៃប្រេង Brent បានឡើងលើស ១០០ដុល្លារ/បារ៉ែល រួចទៅហើយ៕
