ប្រធានាធិបតីកូរ៉េខាងត្បូង លោក លី ជេ ម្យុង នឹងធ្វើទស្សនកិច្ចផ្លូវរដ្ឋទៅកាន់ទីក្រុងប៉េកាំង ដើម្បីជួបប្រជុំកំពូលលើកទី២ ជាមួយប្រធានាធិបតីចិន លោក ស៊ី ជីនពីង ក្នុងរយៈពេលត្រឹមតែពីរខែប៉ុណ្ណោះ។
ប្រភពពីសារព័ត៌មានAl Jazeera នៅថ្ងៃទី២ ខែមករា ឆ្នាំ២០២៦។
ទីប្រឹក្សាសន្តិសុខជាតិកូរ៉េខាងត្បូង លោក វី ស៊ុងឡាក់ បានឲ្យដឹងថា កិច្ចជួបនេះនឹងប្រព្រឹត្តទៅនៅថ្ងៃចន្ទ ខាងមុខ ហើយបន្ទាប់មក លោក លី នឹងបន្តដំណើរទៅទីក្រុងសៀងហៃ ដើម្បីទស្សនាទីតាំងប្រវត្តិសាស្ត្ររបស់រដ្ឋាភិបាលបណ្ដោះអាសន្ន កូរ៉េខាងត្បូង ក្នុងសម័យអាណានិគមជប៉ុន។
មេដឹកនាំទាំងពីរ ត្រូវបានគេរំពឹងថា នឹងពិភាក្សាអំពីកិច្ចសហប្រតិបត្តិការជាក់ស្តែង ដូចជា ខ្សែសង្វាក់ផ្គត់ផ្គង់ ការវិនិយោគ ទេសចរណ៍ និងការឆ្លើយតបទៅនឹងឧក្រិដ្ឋកម្មឆ្លងដែន។ កូរ៉េខាងត្បូងក៏នឹងអំពាវនាវឲ្យចិនដើរតួនាទីស្ថាបនា ក្នុងការដោះស្រាយភាពតានតឹងលើឧបទ្វីបកូរ៉េផងដែរ។
ជាមួយគ្នានេះ កូរ៉េខាងត្បូងបានបញ្ជាក់ជាថ្មីថា ខ្លួនគោរពគោលនយោបាយ «ចិនតែមួយ» ដោយទទួលស្គាល់ជំហររបស់ចិនចំពោះតៃវ៉ាន់ ខណៈនៅតែរក្សាទំនាក់ទំនងមិត្តភាពដោយឡែកជាមួយកោះនេះ៕