ប្រធានាធិបតីកូរ៉េខាងត្បូង លោក Lee Jae Myung នៅថ្ងៃទី២០ ខែមករា ឆ្នាំ២០២៦ បាននិយាយថា សព្វថ្ងៃហាក់មានចន្លោះប្រហោង នៅក្នុងប្រព័ន្ធឃ្លាំមើលរបស់ប្រទេសកូរ៉េខាងត្បូង ក្នុងការពិនិត្យតាមដានដ្រូន ដែលធ្វើប្រតិបត្តិការដោយជនស៊ីវិល ហោះចូលទៅកូរ៉េខាងជើង។
ដោយលោកព្រមានថា ឧប្បត្តិហេតុបែបនេះ អាចបង្កហានិភ័យធ្វើឱ្យការកើនឡើងភាពតានតឹង។
សារព័ត៌មាន Reuters ។
នៅខែមករានេះ កូរ៉េខាងជើង បាននិយាយថា មានយន្តហោះដ្រូនពីកូរ៉េខាងត្បូង បានបង្ហោះចូលមកក្នុងដែនអាកាសរបស់ខ្លួន។
ប៉ូលិសកូរ៉េខាងត្បូង បានឱ្យដឹងថា ក្រុមស៉ើបអង្កេតឧប្បត្តិហេតុនេះ បានកោះហៅជនសង្ស័យម្នាក់ ដែលជាជនស៊ីវិលមកសួរនាំ។
លោក Lee លើកឡើងយ៉ាងដូច្នេះថា វាមិនគួរកើតឡើងសោះឡើយ ដែលជនស៉ីវិលអាចបញ្ជូនដ្រូនចូលទៅកូរ៉េខាងជើង ក្នុងគោលបំណងខុសច្បាប់។ ហេតុអ្វីបានជាយើងមិនអាចពិនិត្យឃើញថា មានដ្រូនត្រូវបានបង្ហោះចូលទៅកូរ៉េខាងជើង។
លោកប្រធានាធិបតី បានបន្តថា សកម្មភាពបែបនេះ គឺស្មើនឹងដុតបញ្ឆេះសង្រ្គាម ហើយបង្កើតភាពតានតឹងមិនចាំបាច់ជាមួយកូរ៉េខាងជើង ដែលជះផលប៉ះពាល់អវិជ្ជមាន ចំពោះសេដ្ឋកិច្ចកូរ៉េខាងត្បូង។
លោកបានអំពាវនាវឱ្យស៊ើបអង្កេត ប្រព្រឹត្តទៅដោយភាពហ្មត់ចត់បំផុត ដើម្បីធានាថា ករណីបែបនេះមិនកើតឡើងម្តងទៀត៕