រដ្ឋាភិបាលចក្រភពអង់គ្លេស បានចាប់ផ្តើមការពិគ្រោះយោបល់អំពីហាមឃាត់ការប្រើប្រាស់ប្រព័ន្ធផ្សព្វផ្សាយសង្គមសម្រាប់កុមារ និងយុវជនអាយុក្រោម ១៦ ឆ្នាំ ដោយយកគំរូតាមប្រទេសអូស្ត្រាលី ដែលបានអនុវត្តវិធានការបែបនេះជាលើកដំបូងលើពិភពលោកកាលពីខែមុន។
ប្រភពពីសារព័ត៌មានAl Jazeera នៅថ្ងៃទី២០ខែមករាឆ្នាំ២០២៦។
ក្នុងសេចក្តីថ្លែងការណ៍កាលពីថ្ងៃចន្ទ រដ្ឋាភិបាលអង់គ្លេសបានឱ្យដឹងថា រដ្ឋមន្ត្រីនឹងធ្វើទស្សនកិច្ចទៅប្រទេសអូស្ត្រាលី ដើម្បីសិក្សាបទពិសោធន៍ និងប្រមូលភស្តុតាងអន្តរជាតិ ពិនិត្យថាតើការហាមឃាត់ប្រព័ន្ធផ្សព្វផ្សាយសង្គមសម្រាប់អនីតិជនមានប្រសិទ្ធភាពឬអត់ និងអាចអនុវត្តបានយ៉ាងដូចម្តេច។
ក្រៅពីការហាមឃាត់ រដ្ឋាភិបាលក៏កំពុងពិចារណាវិធានការផ្សេងៗ ដូចជា ការកំណត់អាយុយល់ព្រមឌីជីថលឱ្យខ្ពស់ជាងមុន ការដាក់បម្រាមគោចរទូរស័ព្ទ ដើម្បីកាត់បន្ថយការប្រើប្រាស់ហួសប្រមាណ និងការរឹតបន្តឹងលក្ខណៈរចនាដែលអាចបង្កភាពញៀនលើបណ្តាញសង្គម ដូចជា “infinite scrolling” និង “streaks”។
ការពិចារណានេះកើតឡើង ខណៈដែលរដ្ឋាភិបាល និងនិយតករនានាជុំវិញពិភពលោកកំពុងព្រួយបារម្ភកាន់តែខ្លាំងអំពីសុវត្ថិភាពកុមារតាមអ៊ីនធឺណិត ជាពិសេសក្នុងបរិបទនៃការកើនឡើងយ៉ាងឆាប់រហ័សនៃខ្លឹមសារដែលបង្កើតដោយបច្ចេកវិទ្យា AI៕