កាលពីយប់ថ្ងៃអាទិត្យទី២៥ខែមករា យន្តហោះឯកជនមួយគ្រឿង ដែលដឹកមនុស្ស ៨នាក់បានធ្លាក់ នៅពេលហោះឡើងនៅអាកាសយានដ្ឋានអន្តរជាតិ Bangor រដ្ឋ Maine នេះបើយោងតាមរដ្ឋបាលអាកាសចរណ៍ សហព័ន្ធអាមេរិក (FAA)។
ប្រភពពីសារព័ត៌មានAP នៅថ្ងៃទី២៦ខែមករា។
យន្តហោះប្រភេទ Bombardier Challenger 600 បានធ្លាក់ប្រហែលម៉ោង ៧:៤៥ យប់ ខណៈដែលព័ត៌មានអំពីស្ថានភាពអ្នកនៅលើយន្តហោះនៅមិនទាន់បញ្ជាក់។
FAA និងក្រុមប្រឹក្សាសុវត្ថិភាពដឹកជញ្ជូនជាតិ (NTSB) កំពុងបើកការស៊ើបអង្កេត។
អាកាសយានដ្ឋានបានបិទជាបណ្តោះអាសន្ន បន្ទាប់ពីក្រុមសង្គ្រោះបន្ទាន់ទៅដល់កន្លែងកើតហេតុ។ ឧប្បត្តិហេតុនេះកើតឡើង ខណៈតំបន់ New England និងភាគច្រើននៃសហរដ្ឋអាមេរិកកំពុងរងឥទ្ធិពលពីព្យុះរដូវរងាដ៏ធំ ដែលបង្កឱ្យមានព្រិលធ្លាក់ខ្លាំង និងរំខានដល់ចរាចរណ៍ និងអគ្គិសនី៕