ទីក្រុងមូស្គូកំពុងបង្កការព្រួយបារម្ភយ៉ាងខ្លាំងដល់ប្រទេសម៉ុលដាវី បន្ទាប់ពីរុស្ស៊ីប្រើដ្រូននៅជិតព្រំដែន ដែលធ្វើឱ្យអារម្មណ៍សង្គ្រាមអ៊ុយក្រែនរាលដាលមកដល់ប្រទេសជិតខាងនេះ។
ប្រភពពីសារព័ត៌មានAFP នៅថ្ងៃទី២៨ខែមករា។
កាលពីខែធ្នូ ម្តាយម្នាក់ត្រូវបានសម្លាប់ និងកូនបីនាក់របស់នាងរងរបួស ខណៈពួកគេកំពុងធ្វើដំណើរឆ្លងកាត់ស្ពានព្រំដែនលើទន្លេ Dniester ចូលទៅកាន់ភូមិ Palanca ភាគអាគ្នេយ៍នៃប្រទេសម៉ុលដាវី។ មន្ត្រីអ៊ុយក្រែនបានបញ្ជាក់ថា ការវាយប្រហារនេះបណ្តាលមកពីដ្រូនរបស់រុស្ស៊ី។
ប្រជាជនក្នុងតំបន់បានពិពណ៌នាអំពីភាពភ័យខ្លាច និងអសន្តិសុខ ខណៈការវាយប្រហារនៅលើច្រកឆ្លងកាត់បានបន្តរយៈពេលពីរថ្ងៃ។ អ្នកភូមិបានបញ្ជាក់ថា ព្រឹត្តិការណ៍នេះបានបង្ហាញយ៉ាងច្បាស់ថា សង្គ្រាមនៅអ៊ុយក្រែនកំពុងបង្កផលប៉ះពាល់ផ្ទាល់ដល់ប្រទេសម៉ុលដាវី ដែលមិនមានពាក់ព័ន្ធដោយផ្ទាល់នឹងជម្លោះនេះឡើយ៕