អតីតប្រធានាធិបតីកូរ៉េខាងត្បូង លោក Yoon Suk Yeol បានប្ដឹងជំទាស់ទៅសាលាឧទ្ធរណ៍កូរ៉េខាងត្បូង ប្រឆាំងនឹងសាលក្រមកាត់ទោស រូបលោកឱ្យជាប់ពន្ធនាគារអស់មួយជីវិត ពីបទបះបោរ ជុំវិញការប្រកាសដាក់ឱ្យប្រើច្បាប់អាជ្ញាសឹកកាលពីឆ្នាំ២០២៤។
សារព័ត៌មាន AFP នៅថ្ងៃទី២៤ ខែកុម្ភៈ ឆ្នាំ២០២៦។
សូមជម្រាបថា តុលាការមួយក្នុងទីក្រុងសេអ៊ូល កាលពីសប្ដាហ៍មុន បានផ្ដន្ទាទោសលោក Yoon Suk Yeol
ឱ្យជាប់ពន្ធនាគារអស់មួយជីវិត។
ប៉ុន្តែនៅក្នុងសេចក្ដីថ្លែងការណ៍មួយនៅថ្ងៃអង្គារ ក្រុមមេធាវីរបស់អតីតប្រធានាធិបតីកូរ៉េខាងត្បូងរូបនេះ បានឱ្យដឹងថាលោក Yoon បានសម្រេចចិត្តប្ដឹងឧទ្ធរណ៍ប្រឆាំង នឹងសាលក្រមកាត់ទោសរូបលោក។
លោក Yoon កាលពីថ្ងៃទី៣ ខែធ្នូ ឆ្នាំ២០២៤ បានបង្កភាពភ្ញាក់ផ្អើលមួយតាមរយៈការប្រកាសដាក់ចេញច្បាប់អាជ្ញាសឹក ។
ក្រោមហេតុផលដែលលោកអះអាងថាដើម្បីប្រឆាំង នឹងការគំរាមកំហែង ពីឥទ្ធិពលកូរ៉េខាងជើង និងកងកម្លាំងប្រឆាំងនឹងរដ្ឋ ដែលលោកចង់សំដៅលើក្រុមគណបក្សប្រឆាំង។
ប៉ុន្តែការប្រកាសប្រើច្បាប់អាជ្ញាសឹកនេះមានរយៈពេលត្រឹមតែ ៦ម៉ោងប៉ុណ្ណោះ បន្ទាប់ពីក្រុមសមាជិកសភាកូរ៉េខាងត្បូងសម្រុកចូលទៅក្នុងអគារសភា ដើម្បីធ្វើការបោះឆ្នោតបន្ទាន់មួយលុបចោល ការប្រកាសប្រើច្បាប់អាជ្ញាសឹក។
លោក Yoon ត្រូវបានតុលាការធម្មនុញ្ញកូរ៉េខាងត្បូង ទម្លាក់ចេញពីតំណែងកាលពីខែមេសា ឆ្នាំ២០២៥ ហើយប្រជាជនកូរ៉េខាងត្បូង បានបោះឆ្នោតគាំទ្រឱ្យ លោក Lee Jae Myung ក្លាយជាប្រធានាធិបតីកូរ៉េខាងត្បូង កាលពីខែមិថុនា ឆ្នាំ២០២៥៕