មន្ត្រីម្នាក់មកពីបេសកកម្មកងទ័ពជើងទឹកសហភាពអឺរ៉ុប បានបញ្ជាក់ថា កប៉ាល់ជាច្រើនបានទទួលសារតាមវិទ្យុVHF ពី កងឆ្មាំបដិវត្តន៍អ៊ីស្លាមដោយប្រកាសថាគ្មានកប៉ាល់ណាមួយត្រូវបានអនុញ្ញាតឱ្យឆ្លងកាត់ច្រកសមុទ្រ Hormuz ទេ។ សេចក្តីថ្លែងការណ៍នេះត្រូវបានរាយការណ៍នៅថ្ងៃទី ២៨ ខែកុម្ភៈ ឆ្នាំ ២០២៦ ខណៈស្ថានការណ៍តំបន់កំពុងតានតឹងខ្លាំង។
ប្រភពពីសារព័ត៌មានReuterនៅថ្ងៃទី១ខែមីនា។
ច្រកសមុទ្រ Hormuz គឺជាផ្លូវដឹកជញ្ជូនប្រេងសំខាន់បំផុតមួយរបស់ពិភពលោក ដែលភ្ជាប់ប្រទេសផលិតប្រេងធំៗក្នុងតំបន់ឈូងសមុទ្រ ដូចជាអារ៉ាប៊ីសាអូឌីត អ៊ីរ៉ង់ អ៊ីរ៉ាក់ និងអារ៉ាប់រួមទៅកាន់ទីផ្សារអន្តរជាតិ។ ប្រសិនបើការបិទឬការរារាំងការធ្វើនាវាចរណ៍កើតមានពិតប្រាកដ វាអាចប៉ះពាល់យ៉ាងធ្ងន់ធ្ងរដល់ការផ្គត់ផ្គង់ថាមពល និងតម្លៃប្រេងសកល។
មន្ត្រីបេសកកម្មអឺរ៉ុបបានបន្ថែមថា ការបញ្ជូនសារនេះកំពុងត្រូវបានតាមដានយ៉ាងជិតស្និទ្ធ ខណៈសហគមន៍អន្តរជាតិព្រួយបារម្ភអំពីសុវត្ថិភាពនាវាចរណ៍ និងស្ថេរភាពសេដ្ឋកិច្ចពិភពលោក៕