ក្រសួងការបរទេសរុស្ស៊ី កាលថ្ងៃទី០១.០៣.២០២៦ បានចេញព្រមានថា ការបិទច្រកសមុទ្រ ហ័រមូស (Hormuz) មិនឱ្យនាវាដឹកជញ្ជូនឆ្លងកាត់ នឹងបង្កឱ្យមានការឡើងថ្លៃប្រេងនៅលើទីផ្សារប្រេង និងឧស្ម័នពិភពលោក។
ព័ត៌មាន Reuters។
ការព្រមាននេះ ធ្វើឡើងបន្ទាប់ពីក្រុមហ៊ុនដឹកជញ្ជូន ក្រុមហ៊ុនប្រេងខ្នាតយក្ស និងពាណិជ្ជករជាច្រើន បានផ្អាកការដឹកជញ្ជូនប្រេងឆៅ ប្រេងឥន្ធនៈ និងឧស្ម័នធម្មជាតិរាវ (LNG) ឆ្លងកាត់ច្រកសមុទ្រនេះជាបណ្តោះអាសន្ន ។
ក្រោយអ៊ីរ៉ង់ ប្រកាសបិទនាវាចរណ៍ទាំងស្រុង ដើម្បីឆ្លើយតបនឹងការវាយប្រហាររបស់អាមេរិក និងអ៊ីស្រាអែល។
ពោលគឺ ២០ភាគរយនៃប្រេងពិភពលោក រួមទាំងការផលិតពីអារ៉ាប៊ីសាអូឌីត អេមីរ៉ាតអារ៉ាប់រួម អ៊ីរ៉ាក់ គុយវ៉ែត និងអ៊ីរ៉ង់ រួមទាំងឧស្ម័ន LNG ចំនួនច្រើនសន្ធឹកសន្ធាប់ពីប្រទេសកាតា គឺត្រូវដឹកជញ្ជូនឆ្លងកាត់ច្រកសមុទ្រមួយនេះ។
ក្រសួងការបរទេសរុស្ស៊ី សម្តែងការខកចិត្ត និងសោកស្តាយយ៉ាងខ្លាំងចំពោះដំណឹងនៃការធ្វើឃាតមេដឹកនាំកំពូលអ៊ីរ៉ង់ លោក អាលី ខាមេណី ព្រមទាំងសមាជិកគ្រួសារ និងមន្ត្រីជាន់ខ្ពស់មួយចំនួនទៀត។
សេចក្តីថ្លែងការណ៍ ទីក្រុងមូស្គូ បានថ្កោលទោសយ៉ាងដាច់អហង្ការចំពោះ «ការធ្វើឃាតនយោបាយ និងការប្រមាញ់មេដឹកនាំនៃរដ្ឋអធិបតេយ្យ» ដោយថាជាការបំពានច្បាប់អន្តរជាតិ៕