ក្រសួងសុខាភិបាល នៃប្រទេសលីបង់ ប្រកាសថា យ៉ាងហោចណាស់មនុស្ស១២៣នាក់បានស្លាប់ និង៦៨៣នាក់រងរបួស បន្ទាប់ពីការវាយប្រហារតាមអាកាសរបស់អ៊ីស្រាអែលក្នុងសប្តាហ៍នេះ។ ការវាយប្រហារបានកើតឡើងនៅតំបន់ជាច្រើន រួមទាំងជាយក្រុងភាគខាងត្បូងនៃទីក្រុង Beirut និងតំបន់ភាគខាងត្បូង និងភាគខាងកើតប្រទេស។
ប្រភពពីសារព័ត៌មានAl Jazeera នៅថ្ងៃទី៦ខែមីនា។
ទីភ្នាក់ងារសារព័ត៌មានជាតិលីបង់បានរាយការណ៍ថា យន្តហោះចម្បាំងអ៊ីស្រាអែលបានវាយប្រហារលើទីក្រុងជាច្រើន ដូចជា Srifa, Aita al-Shaab, Touline, as-Sawana និង Majdal Selem ខណៈការវាយប្រហារផ្សេងទៀតបានកើតឡើងនៅទីក្រុង Douris ភាគខាងកើតប្រទេស។ កងទ័ពអ៊ីស្រាអែលក៏បានវាយប្រហារលើតំបន់ Dahiyeh ក្នុងទីក្រុងបេរូតផងដែរ។
ក្នុងពេលដូចគ្នា ក្រុមប្រដាប់អាវុធហេសបូឡាបានអំពាវនាវឱ្យប្រជាជននៅភាគខាងជើងនៃប្រទេសអ៊ីស្រាអែលជម្លៀសចេញពីតំបន់ក្នុងចម្ងាយប្រហែល ៥គីឡូម៉ែត្រ ពីព្រំដែន ដោយព្រមានថាអាចមានការវាយប្រហារតបតវិញ៕