ភាពតានតឹងនៅមជ្ឈិមបូព៌ាកំពុងកើនឡើង ខណៈដែល អ៊ីរ៉ង់ ប្រកាសថានឹងប្រើប្រាស់មីស៊ីលដ៏មានអានុភាព និងបដិសេធការចរចាជាមួយ សហរដ្ឋអាមេរិក ដែលដឹកនាំដោយប្រធានាធិបតី Donald Trump។ កងឆ្មាំបដិវត្តន៍អ៊ីស្លាមអ៊ីរ៉ង់បានបដិសេធការអះអាងរបស់អាមេរិកថា កម្មវិធីមីស៊ីលរបស់ខ្លួនត្រូវបានបំផ្លាញ ហើយបានអះអាងថាកំពុងដាក់ពង្រាយគ្រាប់មីស៊ីលកាន់តែច្រើន ដែលមានក្បាលគ្រាប់មានទម្ងន់ជាង១តោន។
ប្រភពពីសារព័ត៌មានAl Jazeera នៅថ្ងៃទៅ១០ខែមីនា។
ក្នុងពេលជាមួយគ្នា កងទ័ពរបស់ អ៊ីស្រាអែល បានប្រកាសថា ខ្លួនបានចាប់ផ្តើមការវាយប្រហារទៅលើគោលដៅដែលទាក់ទងនឹងរដ្ឋាភិបាលអ៊ីរ៉ង់ ខណៈការប្រយុទ្ធកំពុងពង្រីកទៅក្នុងតំបន់ជាច្រើន។ នៅ ហ្គាហ្សា ក៏មានការបាញ់ផ្លោងបន្តទៀត ដែលបានបណ្តាលឱ្យមនុស្សជាច្រើនស្លាប់ និងរងរបួស ទោះបីជាមានការប្រកាសបទឈប់បាញ់ក៏ដោយ។
មន្ត្រីសហភាពអឺរ៉ុប Antonio Costa បានព្រមានថា សង្គ្រាមនេះអាចធ្វើឱ្យ រុស្ស៊ី ក្លាយជាអ្នកទទួលផលប្រយោជន៍ធំបំផុត ព្រោះតម្លៃថាមពលកើនឡើង និងការយកចិត្តទុកដាក់របស់ពិភពលោកចំពោះសង្គ្រាមនៅ អ៊ុយក្រែន អាចថយចុះ។ លោកក៏បានអំពាវនាវឱ្យជៀសវាងការកើនឡើងបន្ថែមទៀត ដែលអាចគំរាមកំហែងដល់សន្តិសុខក្នុងតំបន់ និងពិភពលោក៕