នាយករដ្ឋមន្ត្រីអូស្ត្រាលី លោកAnthony Albanese បានប្រកាសថាប្រទេសរបស់លោកនឹងបញ្ជូនមីស៊ីលអាកាសនិងយន្តហោះស៊ើបការណ៍ទៅកាន់តំបន់ឈូងសមុទ្រ ដើម្បីជួយការពារប្រទេសសម្ព័ន្ធមិត្តពីការវាយប្រហាររបស់ អ៊ីរ៉ង់។
ប្រភពពីសារព័ត៌មានAl Jazeera នៅថ្ងៃទី១០ខែមីនា។
តាមការបញ្ជាក់របស់លោក Albanese កងទ័ពអាកាសអូស្ត្រាលីនឹងដាក់ពង្រាយយន្តហោះស៊ើបការណ៍ប្រភេទ Boeing E-7A Wedgetail រួមជាមួយបុគ្គលិកគាំទ្រ ដើម្បីត្រួតពិនិត្យ និងការពារដែនអាកាសលើតំបន់ឈូងសមុទ្រ ក្នុងរយៈពេលប្រហែលបួនសប្តាហ៍។ ក្រៅពីនេះ អូស្ត្រាលីក៏នឹងផ្គត់ផ្គង់មីស៊ីលអាកាសទៅអាកាសរយៈចម្ងាយមធ្យមទៅកាន់ អារ៉ាប់រួមអេមីរ៉ាត បន្ទាប់ពីការពិភាក្សាជាមួយប្រធានាធិបតី Mohammed bin Zayed Al Nahyan។
លោក Albanese បានបញ្ជាក់ថា ការដាក់ពង្រាយយោធានេះមានគោលបំណងការពារតែប៉ុណ្ណោះ ហើយអូស្ត្រាលីមិនមានផែនការវាយប្រហារលើអ៊ីរ៉ង់ ឬបញ្ជូនកងទ័ពដីគោកទៅទីនោះឡើយ៕