របបអ៊ីរ៉ង់ ហាក់បន្ទន់ឥរិយាបថ ដោយមិនសូវគំរាមប្រយុទ្ធដូចមុនៗ ហើយថែមទាំងដាក់លក្ខខណ្ឌទៅសហរដ្ឋអាមេរិកនិងអ៊ីស្រាអែល ក្នុងគោលបំណងពន្លត់ភ្លើងសង្គ្រាម ដែលឆាបឆេះនិងរាលដាលពេញតំបន់មជ្ឈិមបូព៌ា។
ប្រភពពីAl Jazeera នៅថ្ងៃទី១២.០៣.២០២៦។
ប្រធានាធិបតីអ៊ីរ៉ង់ Masoud Pezeshkian បានប្រាប់លក្ខខណ្ឌ៣ចំណុចថា បើចង់ឲ្យសង្គ្រាមចប់ អាមេរិកនិងអ៊ីស្រាអែលត្រូវ៖ ទទួលស្គាល់សិទ្ធិស្របច្បាប់របស់ទីក្រុងតេហេរ៉ង់ ទូទាត់ថ្លៃសំណងខូចខាត និងត្រូវមានការធានាជាអន្តរជាតិថា ប្រទេសរបស់ខ្លួនមិនរងការឈ្លានពានទៀតទេនាពេលអនាគត។
តាមការផ្សាយរបស់សារព័ត៌មាន Yeni Safak, លោក Pezeshkian បានបង្ហាញលក្ខខណ្ឌទាំងនេះ អំឡុលពេលពិភាក្សាតាមទូរស័ព្ទជាមួយមេដឹកនាំនៃប្រទេសរុស្ស៊ីនិងប៉ាគីស្ថាន កាលពីថ្ងៃពុធទី១១ ខែមីនា។
*លក្ខខណ្ឌទី១ ដែលជាសិទ្ធិស្របច្បាប់ក្នុងបរិបទនេះ សំដៅទៅលើសិទ្ធិរបស់អ៊ីរ៉ង់ក្នុងការអភិវឌ្ឍបច្ចេកវិទ្យានុយក្លេអ៊ែរសម្រាប់គោលបំណងសន្តិភាព និងការរួចផុតពីទណ្ឌកម្មសេដ្ឋកិច្ច។
*លក្ខខណ្ឌទី២ អ៊ីរ៉ង់ ទាមទារសំណងចំពោះការខូចខាតសេដ្ឋកិច្ចដែលបង្កឡើងដោយទណ្ឌកម្មរបស់អាមេរិក និងការវាយប្រហារនានាកន្លងមក។
*លក្ខខណ្ឌទី៣ អ៊ីរ៉ង់ចង់បានការធានាផ្លូវច្បាប់ថា អាមេរិកនឹងមិនដកខ្លួនចេញពីកិច្ចព្រមព្រៀងម្តងទៀត ឬវាយប្រហារអ៊ីរ៉ង់នៅថ្ងៃក្រោយនោះទេ។
ប៉ុន្តែុមានសេចក្តីរាយការណ៍ថា ទីក្រុងតេហេរ៉ង់ នៅមិនទាន់បញ្ចេញអាវុធយុទ្ធសាស្ត្រដ៏មានឥទ្ធិពលបំផុត របស់ខ្លួននៅឡើយទេ ទោះបីជាបានបាញ់បង្ហោះដ្រូន និងមីស៊ីលរាប់ពាន់គ្រាប់រួចទៅហើយ។
គួរំលឹកថា សង្គ្រាមនៅមជ្ឈិមបូព៌ា បានឈានចូលដល់សប្តាហ៍ទី២ហើយ មនុស្សស្លាប់នៅអ៊ីរ៉ង់ ឈានដល់១.៣០០នាក់ ក្នុងនោះរួមទាំងមេដឹកនាំកំពូល Ali Khamenei ផងដែរ៕