មន្ត្រីជាន់ខ្ពស់របស់ប្រទេសកាតា បានបដិសេធការចោទប្រកាន់របស់ប្រព័ន្ធផ្សព្វផ្សាយអ៊ីស្រាអែលថាផ្អាកផលិតឧស្ម័នធម្មជាតិរាវ (LNG) របស់ខ្លួនគឺមានគោលបំណងដើម្បីប៉ះពាល់ដល់សហរដ្ឋអាមេរិក។ កាតាបានហៅការចោទប្រកាន់នេះថា ជាការជំរុញឲ្យមានជម្លោះរវាងកាតា និងសហរដ្ឋអាមេរិក។
ប្រភពពីសារព័ត៌មានAl Jazeera នៅថ្ងៃទី១៣ខែមីនា។
ការផ្អាកផលិតនេះត្រូវបានអនុវត្តបន្ទាប់ពីមានការវាយប្រហារដោយដ្រូនពីអ៊ីរ៉ង់ លើទីតាំងថាមពលនៅទីក្រុងឧស្សាហកម្ម Mesaieed និង Ras Laffan ដែលជាកម្មសិទ្ធិរបស់ក្រុមហ៊ុន QatarEnergy។ មន្ត្រីកាតាបានបញ្ជាក់ថា ការសម្រេចចិត្តនេះធ្វើឡើងដើម្បីការពារសុវត្ថិភាពប្រជាជន មិនមែនមានហេតុផលនយោបាយ ឬសេដ្ឋកិច្ចឡើយ។
ជាមួយគ្នានេះ កាតាបានចោទថា ការអះអាងពីអ្នកវិភាគនយោបាយអ៊ីស្រាអែលដែលភ្ជាប់ការផ្អាកផលិតនេះជាមួយអ៊ីរ៉ង់ គឺជាព័ត៌មានមិនពិត និងមានគោលបំណងបង្កើនភាពតានតឹងក្នុងតំបន់៕
គួរបញ្ជាក់ថា កាតាជាប្រទេសផ្គត់ផ្គង់ LNG ប្រហែល ២០% នៃពិភពលោក ហើយការផ្អាកផលិតនេះបានធ្វើឱ្យទីផ្សារថាមពលសកលមានភាពតានតឹង៕