(បន្ទាយមានជ័យ)៖ ពលរដ្ឋភៀសសឹក មកពីភូមិបន្ទាយមានរិទ្ធ ចំនួន ៥០៤គ្រួសារ និងភូមិសាមគ្គីចំនួន ៣១៨គ្រួសារ នៃតំបន់បឹងត្រកួន ស្រុកថ្មពួក ខេត្តបន្ទាយមានជ័យ។
ដែលត្រូវចាប់ឆ្នោតក្នុងជំហានដំបូង កាលពីថ្ងៃទី២០ ខែមីនា ឆ្នាំ២០២៦ បន្តរៀបចំមកស្នាក់នៅក្នុងជម្រកបណ្តោះអាសន្ន ដែលរាជរដ្ឋាភិបាលសាងសង់រួចរាល់ ជាជំហានទី១ ស្ថិតនៅភូមិស្លក្រាម ឃុំស្លក្រាម ស្រុកស្វាយចេក…ការចាប់ឆ្នោតជំហានទី២ នឹងធ្វើឡើងនៅថ្ងៃទី១០ ខែមេសា ឆ្នាំ២០១៦។
ចំពោះផ្ទះអតីតយុទ្ធដែលបងប្អូនភៀសសឹកត្រូវទៅស្នាក់នៅបណ្តោះអាសន្ន មានផ្ទៃដីទំហំ ២០គុណ ៣០ម៉ែត្រ ព្រមទាំងមានបន្ទប់ទឹកប្រេីប្រាស់ផងដែរ។
សម្រាប់ទីតាំងជម្រកស្នាក់នៅបណ្តោះអាសន្ននេះ ត្រូវបានអាជ្ញាធររៀបចំសាងសង់ឱ្យមានជាសាលារៀន មណ្ឌលសុខភាព ទីស្នាក់ការសន្តិសុខ សម្រាប់បម្រើសេវាជូនបងប្អូនភៀសសឹកជាដើម។
ការចាប់ឆ្នោតជ្រើសរើសដីឡូតិ៍ ជូនប្រជាពលរដ្ឋភៀសសឹក បានធ្វើឡើងនាថ្ងៃទី១៨ ខែមីនា ឆ្នាំ២០២៦ នៅមណ្ឌលសុវត្ថិភាពវត្តកណ្តោល ក្រោមអធិបតីភាពពីលោក ប្លែក វ៉ារី ប្រធានក្រុមប្រឹក្សាខេត្ត លោក អ៊ុំ រាត្រី អភិបាលខេត្ត និងមានការចូលរួមពីលោក ប្រាក់ ដាវីដ អនុប្រធានក្រុមការងាររាជដ្ឋបាលភិបាលចុះមូលដ្ឋានខេត្តបន្ទាយមានជ័យ និងជាប្រធានក្រុមការងារចុះមូលដ្ឋានស្រុកថ្មពួក។
អភិបាលខេត្តបន្ទាយមានជ័យ បានឱ្យដឹងថា ជម្រកបណ្ដោះអាសន្ន ផ្ទះអតីតយុទ្ធជនដែលបងប្អូនស្នាក់នៅ គឺមានការរៀបចំហេដ្ឋារចនាសម្ព័ន្ធ មានទឹក និងមានភ្លើងប្រេីប្រាស់គ្រប់គ្រាន់។
ដេីម្បីជួយសម្រួលដល់បងប្អូនជនភៀសសឹក រាជរដ្ឋាភិបាលជួយសម្រួលថ្លៃទឹក ថ្លៃភ្លើង ជូនបងប្អូនរយៈពេលពេញមួយឆ្នាំ ដោយកំណត់មួយខ្នងផ្ទះប្រេីប្រាស់តែ៣០គីឡូវ៉ាត់ ក្នុងមួយខែ។
បច្ចុប្បន្ន ក្រុមការងារកំពុងបន្តការងារសាងសង់ផ្ទះអតីតយុទ្ធ ដែលត្រៀមឱ្យជនភៀសសឹកស្នាក់បណ្តោះអាសន្ន សម្រេចបានប្រមាណ៣០០ខ្នងផ្ទះហេីយ តាមការគ្រោងទុក នឹងបញ្ចប់ការសាងសង់ផ្ទះ ៣.០០០ខ្នង ឱ្យឆាប់រួចរាល់មុនចូលឆ្នាំថ្មីប្រពៃណីជាតិនាពេលខាងមុខនេះ។
សម្តេចបវរធិបតី នាយករដ្ឋមន្ត្រីនៃកម្ពុជា ធ្លាប់បញ្ជាក់ថា ការផ្តល់ជម្រកបណ្តោះអាសន្នដល់ជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន ។
គឺជាការគិតគូរពីសុខទុក្ខរបស់ពួកគាត់ទាំងបរិស្ថាន និងសុខុមាលភាព តែមិនមែនមានន័យថា រាជរដ្ឋាភិបាល បោះបង់សិទ្ធិទាមទារទឹកដីនោះឡើយ។
រាជរដ្ឋាភិបាល ជំហរដាច់ខាតក្នុងការការពារបូរណភាពទឹកដី ហើយបាននិងកំពុងធ្វើការងារនេះយ៉ាងសកម្មតាមយន្តការការទូត៕