ពិភពលោកបានទទួលការធូរស្រាលបន្តិចនៅដើមខែមីនា បន្ទាប់ពីអារ៉ាប៊ីសាអូឌីត នាំចេញប្រេងឆៅរាប់លានបារ៉ែលតាមកំពង់ផែសមុទ្រក្រហម Yanbu។ ទោះយ៉ាងណា ស្ថានការណ៍បានកើនតានតឹងឡើងវិញ បន្ទាប់ពីក្រុមប្រដាប់អាវុធហ៊ូធីនៅយ៉េមែនគំរាមកំហែងដល់ផ្លូវដឹកជញ្ជូនប្រេងសំខាន់នេះ។
ប្រភពពីសារព័ត៌មានCNN នៅថ្ងៃទី៣១ខែមីនា។
យោងតាមទិន្នន័យពីក្រុមហ៊ុនតាមដានការដឹកជញ្ជូន Vortexa ក្នុងរយៈពេលពីរសប្តាហ៍កន្លងមក មានប្រេងប្រហែល 4.6 លានបារ៉ែលក្នុងមួយថ្ងៃ ត្រូវបានផ្ទុកទៅលើនាវានៅកំពង់ផែ Yanbu ដែលខ្ពស់ជាងចំនួនជាមធ្យមក្នុងឆ្នាំ 2025 ជាងបីដង។ ទោះបីជាយ៉ាងនេះក៏ដោយ វានៅតែមិនអាចជំនួសប្រេងប្រហែល 15 លានបារ៉ែលក្នុងមួយថ្ងៃ ដែលពិភពលោកបានបាត់បង់ ដោយសារការបិទច្រកសមុទ្រ Hormuz។
អ្នកវិភាគថាមពលបានព្រមានថា ប្រសិនបើមានការរំខានដល់ការនាំចេញប្រេងពីសមុទ្រក្រហម វាអាចធ្វើឲ្យ តម្លៃប្រេងពិភពលោកកើនឡើងខ្លាំង និងបង្កឲ្យមានការខ្វះខាតប្រេងឥន្ធនៈនៅតំបន់មួយចំនួន៕