រដ្ឋមន្ត្រីការពារជាតិអ៊ីតាលី លោក Guido Crosetto បានថ្កោលទោសយ៉ាងខ្លាំងចំពោះការវាយប្រហារលើកងកម្លាំងបណ្ដោះអាសន្នរបស់អង្គការសហប្រជាជាតិនៅលីបង់ (UNIFIL) ដោយហៅវាថាមិនអាចអត់ឱនបាន ហើយក៏មិនអាចទទួលយកបានដែរ។
ប្រភពពីសារព័ត៌មានAnadolu Agency នៅថ្ងៃទី៣១ខែមីនា។
តាមសេចក្តីថ្លែងការណ៍របស់ UNIFIL កងកម្លាំងរក្សាសន្តិភាពពីរនាក់ត្រូវបានសម្លាប់ និងពីរនាក់ទៀតរងរបួស ក្នុងការផ្ទុះមួយដែលបានវាយប្រហារយានយន្តរបស់ពួកគេ នៅជិតទីក្រុង Bani Hayyan ក្នុងស្រុក Marjeyoun District។ ម្នាក់ក្នុងចំណោមអ្នករងរបួសត្រូវបានរាយការណ៍ថារងរបួសធ្ងន់ធ្ងរ។
អង្គការសហប្រជាជាតិបានចាប់ផ្តើមការស៊ើបអង្កេតលើឧប្បត្តិហេតុនេះ ខណៈអ៊ីតាលី និងប្រទេសជាច្រើនបានអំពាវនាវឱ្យគ្រប់ភាគីគោរពUNIFIL និងការពារជនស៊ីវិល និងបុគ្គលិកអន្តរជាតិ៕