នាយករដ្ឋមន្ត្រីអ៊ីស្រាអែល លោកBenjamin Netanyahu បានស្នើសុំឱ្យតុលាការពន្យារពេលការកាត់ក្តីអំពើពុករលួយរបស់លោករយៈពេល២សប្តាហ៍ ដោយលើកឡើងពីហេតុផលសន្តិសុខនិងហេតុផលនយោបាយ។ ការស្នើសុំនេះកើតឡើង ខណៈតុលាការក្រុងJerusalem គ្រោងនឹងបន្តសវនាការវិញនៅថ្ងៃអាទិត្យ បន្ទាប់ពីបានផ្អាកដោយសារជម្លោះយោធារវាងអ៊ីស្រាអែលនិងអ៊ីរ៉ង់ដែលចាប់ផ្តើមនៅថ្ងៃទី២៨ខែកុម្ភៈ។
ប្រភពពីសារព័ត៌មានAnadolu Agency នៅថ្ងៃទី១១ខែមេសា។
លោក Netanyahu កំពុងប្រឈមមុខនឹងការចោទប្រកាន់ពីបទសូកប៉ាន់ ការក្លែងបន្លំ និងការរំលោភលើសេចក្តីទុកចិត្តក្នុងសំណុំរឿងធំៗ ៣ គឺ សំណុំរឿង 1000, 2000 និង 4000។ សំណុំរឿងទាំងនេះពាក់ព័ន្ធនឹងការទទួលអំណោយពីអ្នកជំនួញ ការចរចាជាមួយម្ចាស់កាសែត ដើម្បីទទួលបានការផ្សាយព័ត៌មានអំណោយផល និងការផ្តល់អត្ថប្រយោជន៍ផ្នែកបទប្បញ្ញត្តិដល់ក្រុមហ៊ុនទូរគមនាគមន៍មួយ ជាថ្នូរនឹងការផ្សាយព័ត៌មានវិជ្ជមាន៕