មន្ត្រីជាន់ខ្ពស់ម្នាក់ នៅមន្ទីរបញ្ចកោណបាននិយាយកាលពីថ្ងៃពុធទី២៩ ខែមេសា ថាសង្គ្រាមរបស់អាមេរិក លើអ៊ីរ៉ង់ បានចំណាយប្រាក់អស់២៥ពាន់លានដុល្លារ បើគិតមកដល់ពេលនេះ។
នៅសល់រយៈពេលប្រាំមួយខែ ការបោះឆ្នោតពាក់កណ្តាលអាណត្តិ ដែលគណបក្សសាធារណរដ្ឋរបស់លោក Trump អាចនឹងប្រឈមការតតាំងដ៏លំបាក ដើម្បីរក្សាសំឡេងភាគច្រើននៅក្នុងសភា។
គណបក្សប្រជាធិបតេយ្យ កំពុងទទួលបានប្រជាប្រិយភាពខ្ពស់ នៅក្នុងការបោះឆ្នោតស្ទង់មតិសាធារណៈ។
ខណៈពួកគេព្យាយាមភ្ជាប់សង្គ្រាម នៅអ៊ីរ៉ង់ ដែលពុំមានការគាំទ្រច្រើនទៅនឹងលទ្ធភាពដែលអាចធ្វើទៅបាន។
លោក Jules Hurst ជាអ្នកកំពុងបំពេញកាតព្វកិច្ច ជាអ្នកកាន់បញ្ជី បាននិយាយទៅកាន់សមាជិកសភា នៅក្នុងគណៈកម្មាធិការសេវាប្រដាប់អាវុធសភាថា ភាគច្រើននៃប្រាក់ចំណាយនោះគឺសម្រាប់តែគ្រាប់រំសេវ។
លោក Hurst មិនបានរៀបរាប់លម្អិតអំពីអ្វីខ្លះដែលការប៉ាន់ស្មានពីការចំណាយនោះត្រូវបានរួមបញ្ចូល និងថាតើវាបានចំណាយតាមគ្រោងទុកលើការកសាងឡើងវិញ និងជួសជុលហេដ្ឋារចនាសម្ព័ន្ធមូលដ្ឋាននៅមជ្ឈិមបូព៌ាដែលត្រូវបានបំផ្លាញនៅក្នុងជម្លោះ ដែរឬយ៉ាងណា។
សហរដ្ឋអាមេរិក បានចាប់ផ្តើមវាយប្រហារប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ហើយភាគីទាំងពីរកំពុងរក្សាបទឈប់បាញ់ដ៏ផុយស្រួយ។ មន្ទីរបញ្ចកោណ បានបញ្ជូនកងកម្លាំងបន្ថែមរាប់ម៉ឺននាក់ ទៅកាន់តំបន់មជ្ឈិមបូព៌ា រួមទាំងការរក្សាទុកនាវាផ្ទុកយន្តហោះចំនួនបីគ្រឿង៕