យ៉ាងហោចណាស់មនុស្ស១២នាក់ បានស្លាប់ក្នុងការវាយប្រហារតាមអាកាសចុងក្រោយរបស់អ៊ីស្រាអែល នៅភាគខាងត្បូងប្រទេសលីបង់។ ការវាយប្រហារនេះបានកើតឡើងនៅភូមិ Habboush ក្នុងតំបន់ Nabatieh ដែលបណ្តាលឱ្យមានអ្នករងរបួសជាច្រើននាក់ផងដែរ។
ប្រភពពីសារព័ត៌មានAl Jazeera នៅថ្ងៃទី២ខែឧសភា។
តាមរបាយការណ៍ ព្រឹត្តិការណ៍វាយប្រហារនេះបានបំផ្លាញសំណង់លំនៅដ្ឋានជាច្រើន និងបង្កឱ្យមានការខូចខាតធ្ងន់ធ្ងរ។ ក្រុមសង្គ្រោះបន្ទាន់បានស្វែងរកអ្នករស់រានមានជីវិតក្រោមគំនរបាក់បែក។
ការវាយប្រហារមិនបានកើតឡើងតែមួយទីតាំងទេ ប៉ុន្តែមានរបាយការណ៍ថាបានវាយប្រហារយ៉ាងហោចណាស់ប្រាំមួយកន្លែងផ្សេងទៀតនៅភាគខាងត្បូង ដែលបណ្តាលឱ្យមានអ្នកស្លាប់បន្ថែម។ មុនពេលវាយប្រហារ អ៊ីស្រាអែលបានចេញការព្រមានឱ្យប្រជាជនជម្លៀសចេញពីតំបន់ ប៉ុន្តែមួយចំនួននៃការវាយប្រហារមុននេះត្រូវបានរាយការណ៍ថាមិនមានការព្រមានជាមុនឡើយ៕