(កោះកុង)៖ ប្រជាពលរដ្ឋជាង៤០គ្រួសារ ដែលកំពុងរស់នៅតំបន់ជ្រោះដំណាក់ក្បូន នៃឧទ្យានជាតិជួរភ្នំក្រវាញ ក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង បានលើកឡើងថា ពួកខ្លួននឹងមិនរុះរើចេញពីទីតាំងនេះជាដាច់ខាត!។
ដោយអះអាងថា អាជ្ញាធរនិងមន្ត្រីជំនាញ តែងតែធ្វើទុក្ខបុកម្នេញប្រទាញប្រទង់ បណ្ដេញពួកខ្លួនចេញពីផ្ទះនិងខ្ទមគ្មានស្រាកស្រាន្តនោះឡើយ.!!។
*ករណីនេះមន្ត្រីជំនាញបរិស្ថាន បានបដិសេធមិនបកស្រាយ.!។
*ក្រុមពលរដ្ឋ បានអះអាងប្រាប់”ដើមរាំង”នៅថ្ងៃទី០២.០៥.២០២៦ថា ពួកខ្លួនបានកាន់កាប់និងរស់នៅលើដីនេះជាង១០ឆ្នាំមកហើយ.!។
ពោលគឺ ការរស់នៅពឹងផ្អែកលើការលក់ដូរបន្តិចបន្តួច ដល់ភ្ញៀវដែលមកលេងកម្សាន្ត នៅស្ទឹងដំណាក់ក្បូន..!។
*ពលរដ្ឋបន្តថា អ្នកស្នាក់នៅតំបន់ស្ទឹងដំណាក់ក្បូន សរុបជាង៤០គ្រួសារ.ដោយក្នុង១គ្រួសារៗ កាន់កាប់ដីប្រមាណជាទទឹង៥ម៉ែត្រ បណ្ដោយជាង១០ម៉ែត្រ មានផ្ទះនិងខ្ទមតូចៗរស់នៅរហូតមក..!។
*លុះដល់ថ្មីៗនេះ ស្រាប់តែមន្ត្រីបរិស្ថាននិងអាជ្ញាធរ មកជូនដំណឹងឱ្យពួកគាត់រើចេញ ជាបន្តបន្ទាប់ចំនួន៣លើកហើយ.ប៉ុន្តែពលរដ្ឋមិនព្រមរើចេញនោះទេ..!!។
*មិនតែប៉ុណ្ណោះ នៅថ្ងៃទី០១.០៥.២០២៦ មន្ត្រីបរិស្ថាន បានចុះមករុះរើ និងបណ្ដេញពួកគាត់ឱ្យចេញពីដី ដែលកំពុងស្នាក់នៅត្រង់ចំណុចខាងលើ ហើយក៏មានការប្រទាញប្រទង់គ្នា រវាងមន្ត្រីបរិស្ថាននិងប្រជាពលរដ្ឋ.!។
ពលរដ្ឋបន្ថែមថា អំឡុងពេលចុះបណ្ដេញពួកខ្លួននោះ គឺក្រុមមន្ត្រីប្រដាប់ដោយអាវុធ បានចាប់ក្រៀកនិងទាញដៃស្ដ្រីកូនខ្ចីម្នាក់ទាំងបង្ខំ ដោយមិនខ្លាចបង្កគ្រោះថ្នាក់ដល់រូបនាង ដែលទើបនិងសំរាលកូនទាល់តែសោះ.!។
*បើតាមពលរដ្ឋ អាជ្ញាធរបានប្រកាសទុកឱសានវាទចុងក្រោយ ដល់ពួកខ្លួន ឱ្យរើចេញពីតំបន់ខាងលើជាកំហិត! មិនឱ្យលើសថ្ងៃទី០៥.០៥.២០២៦នោះឡើយ.!។
ដោយអាជ្ញាធរព្រមានថា ប្រសិនបើពលរដ្ឋមិនព្រមរុះរើចេញ តាមការកំណត់ទេ! នោះកម្លាំងអាជ្ញាធរនឹងចុះរុះរើផ្ទះសម្បែងពួកគាត់ចោលមិនខាន!!។
*ទោះជាយ៉ាងនេះក្ដី ពលរដ្ឋអះអាងថា ពួកខ្លួននឹងមិនរុះរើចេញទៅណាឡើយ!។
ដោយផ្អែកថា ពួកគាត់រស់នៅទីនេះយូរឆ្នាំហើយ បើរើចេញមិនដឹងទៅនៅកន្លែងណា..?!។
ម្យ៉ាងវិញទៀត ពួកគាត់មានជីវភាពខ្សត់ខ្សោយ និងខ្វះខាត ការយល់ដឹងនៅមានកម្រិត និងពុំមានលទ្ធភាព ទិញដីកន្លែងផ្សេងសម្រាប់រស់នៅ..!។
*ដើម្បីឱ្យមានចម្លើយទាំងសងខាងនៅល្ងាចថ្ងៃទី០២.០៥.២០២៦”ដើមរាំង”បានសុំការបំភ្លឺពីលោក វិន សុវាន មេភូមិកោះប៉ោ ដោយលោកថ្លែងថា ពលរដ្ឋដែលស្នាក់នៅត្រង់ចំណុចខាងលើ ភាគច្រើនជាអ្នកចំណាកស្រុកមកពីឆ្ងាយ.ហើយតំបន់នោះដាច់ស្រយាល ចម្ងាយពីភូមិប្រហែល២០គីឡូម៉ែត្រ.!!។
លោកមេភូមិបន្តថា ដើមចមដំបូងកាលពីប៉ុន្មានឆ្នាំមុន.!មានការសាងសង់វារីអគ្គិសនី ហើយកម្មករប្រមាណជា៤ទៅ៥គ្រួសារ បានសង់ខ្ទមស្នាក់នៅទីនោះជាបណ្ដោះអាសន្ន.!។
លុះវារីអគ្គិសនីសាងសង់រួចរាល់ ពួកគាត់មិនព្រមទៅណា ហើយថែមទាំងមានអ្នកចំណូលថ្មី មកនៅជាបន្តបន្ទាប់!។
លោក វិន សុវាន បន្តថា ករណីនេះអាជ្ញាធរបានទុកឱសានវាទចុងក្រោយដល់ពួកគាត់ ដើម្បីឱ្យរើចេញផងដែរ.!។
*ចំពោះសំណួរថា តើដីត្រង់ចំណុចខាងលើ មានការវិនិយោគអ្វីទេ.បានជាត្រូវបណ្ដេញពលរដ្ឋ.ហើយតើមានករណីចាប់ទាញស្ដ្រីកូនខ្ចីដែរឬទេ.??។
*លោក វិន សុវាន បានឆ្លើយថា តាមខ្ញុំដឹងគេវិនិយោគឱ្យក្រុមហ៊ុនទំហំ១០ហិកតា.!។
ពាក់ព័ន្ធការចាប់ទាញស្ដ្រីកូនខ្ចីអីនោះ គឺរូបលោកមិនបានដឹងទេ.!។
*លោក ថូវ ប៊ុនកេ មេឃុំប៉ាក់ខ្លង
មិនអាចសុំការបញ្ជាក់បានទេ ព្រោះទូរស័ព្ទចូលហើយគ្មានអ្នកទទួល.!។
*រីឯលោក សុខ ភិរម្យ អភិបាលស្រុកមណ្ឌលសីមា
បានរុញឱ្យទៅសួរអភិបាលរងស្រុកជំនួសវិញ.!។
លោក ប៉ែន ប៊ុនឈួយ អភិបាលរងស្រុក
បានថ្លែងប្រាប់”ដើមរាំង”ថា ដីនៅតំបន់ជ្រោះដំណាក់ក្បូន គឺពុំមានការវិនិយោគឱ្យក្រុមហ៊ុននោះទេ!។
លោកបន្តថា កាលពីកំឡុងឆ្នាំ២០១៩ មានក្រុមហ៊ុន១ ទទួលបានសិទ្ធិវិនិយោគដែរ ប៉ុន្តែមិនឃើញធ្វើអ្វីរហូតបច្ចុប្បន្ន.!។
លោក ប៉ែន ប៊ុនឈួយ អះអាងថា មិនអាចបង្កើតសហគមន៍បានទេ ព្រោះពលរដ្ឋនៅទីនោះជាអ្នកមកពីឆ្ងាយ.!។
*ចំពោះសំណួរថា តើមានការចាប់ទាញស្ដ្រីកូនខ្ចីឬទេ..?។
លោក ប៉ែន ប៊ុនឈួយ បានឆ្លើយថា ខ្ញុំមិនដឹងទេព្រោះខាងបរិស្ថានអ្នកចុះទៅ..!។
*ចំណែកលោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានបដិសេធមិនបកស្រាយឡើយ.!។
*ចំពោះលោក ឈិត រតនៈ អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង
ក៏មិនអាចសុំការអត្ថាធិប្បាយបានដែរ ដោយទូរស័ព្ទចូលចំនួន២ដងគ្មានអ្នកទទួល.!។
*តាមរយៈសារព័ត៌មាន”ដើមរាំង”ពលរដ្ឋសុំស្នើយ៉ាងទទូចដល់លោកជំទាវ ឈី វ៉ា អភិបាលខេត្តកោះកុង ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាជួយអន្តរាគមន៍ ឱ្យពួកគាត់បន្តស្នាក់នៅលើដីត្រង់ចំណុចខាងលើ ដោយក្ដីអនុគ្រោះ កុំឱ្យអាជ្ញាធរខេត្តកោះកុង ធ្វើទុក្ខបុកម្នេញ បណ្ដេញពួកគាត់តទៅទៀត និងសុំបង្កើតសហគមន៍ ដើម្បីជីវភាពនិងបណ្ដុះបណ្ដាល៕
