នាវិក៥នាក់ត្រូវបានរាយការណ៍ថាបាត់ខ្លួន និង ១០នាក់ផ្សេងទៀតរងរបួស។
បន្ទាប់ពីការវាយប្រហាររបស់សហរដ្ឋអាមេរិក លើនាវាដឹកទំនិញអ៊ីរ៉ង់មួយគ្រឿង នៅជិតច្រកសមុទ្រ Hormuz និងឈូងសមុទ្រអូម៉ង់ នៅយប់ថ្ងៃព្រហស្បតិ៍ទី០៧.០៥.២០២៦ នេះបើយោងតាមមន្ត្រីអ៊ីរ៉ង់ម្នាក់។
សារព័ត៌មានAnadolu។
លោក Mohammad Radmehr អភិបាលខេត្ត Minab នៅភាគខាងត្បូងអ៊ីរ៉ង់ បាននិយាយថា នាវាដឹកទំនិញស៊ីវិលមួយគ្រឿង ដែលជាកម្មសិទ្ធិរបស់អ្នកស្រុក Kolahi ក្នុង Minab ត្រូវបានសហរដ្ឋអាមេរិកវាយប្រហារ នៅជិតផ្លូវទឹកយុទ្ធសាស្ត្រ នេះបើយោងតាមទីភ្នាក់ងារសារព័ត៌មាន Mehr របស់អ៊ីរ៉ង់។
លោកបាននិយាយថា នាវានេះបានឆេះបន្ទាប់ពីត្រូវបានវាយប្រហារ នៅក្នុងដែនទឹកនៃខេត្ត Minab។
លោក Radmehr បាននិយាយថា នាវិក១៥ នាក់នៅលើនាវានៅពេលកើតហេតុ។
លោកបានបន្ថែមថា“នាវិកដែលរងរបួសត្រូវបានបញ្ជូនទៅមន្ទីរពេទ្យ ខណៈដែលក្រុមក្នុងស្រុក និងក្រុមជួយសង្គ្រោះកំពុងព្យាយាមកំណត់ជោគវាសនារបស់នាវិកដែលនៅសល់”។
មន្ត្រីអ៊ីរ៉ង់បានពិពណ៌នា អំពីការកំណត់គោលដៅលើនាវាពាណិជ្ជកម្មថាជាសញ្ញានៃអ្វីដែលលោកហៅថា“ភាពអស់សង្ឃឹម”របស់សត្រូវ។
ហេតុការណ៍នេះបានកើតឡើងប៉ុន្មានថ្ងៃបន្ទាប់ពីប្រព័ន្ធផ្សព្វផ្សាយអ៊ីរ៉ង់បានរាយការណ៍ថា កងកម្លាំងទ័ពជើងទឹកអាមេរិកបានកំណត់គោលដៅលើអ្វីដែលទីក្រុងវ៉ាស៊ីនតោនពិពណ៌នាថាជាទូកមីស៊ីលរបស់កងឆ្មាំបដិវត្តន៍អ៊ីស្លាមនៅក្នុងច្រកសមុទ្រ Hormuz។ ក្រោយមក សារព័ត៌មានអ៊ីរ៉ង់បានអះអាងថា នាវាទាំងនោះគឺជាទូកនេសាទស៊ីវិល និងទូកដឹកទំនិញ៕