(ភ្នំពេញ)៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន កាលពីព្រឹកថ្ងៃទី៨ ខែឧសភា ឆ្នាំ២០២៦ បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យា រវាងអង្គភាពគ្រប់គ្រងគម្រោងសាងសង់ស្ពានកោះខ្សាច់ទន្លា(KTB) និងសម្ព័ន្ធក្រុមហ៊ុនទីប្រឹក្សាបច្ចេកទេសដឹកនាំដោយ CHODAI Co.LTD នៃប្រទេសជប៉ុន។
ដើម្បីផ្តល់សេវាប្រឹក្សាយោបល់សម្រាប់ការសិក្សាសមិទ្ធិលទ្ធភាព ការរៀបចំគម្រោងប្លង់បច្ចេកទេសលម្អិត និងការត្រួតពិនិត្យការសាងសង់គម្រោងស្ពានកោះខ្សាច់ទន្លា..!។
ពិធីនេះក៏មានការចូលរួមពីតំណាងក្រុមហ៊ុនដៃគូ ថ្នាក់ដឹកនាំក្រសួង មន្ត្រីនៃក្រសួងពាក់ព័ន្ធ និងមន្ត្រីរាជការជាច្រើនរូប ក្នុងគោលបំណងជំរុញដំណើរការគម្រោងឱ្យឈានទៅមុខប្រកបដោយប្រសិទ្ធភាព និងស្របតាមផែនការអភិវឌ្ឍហេដ្ឋារចនាសម្ព័ន្ធរបស់កម្ពុជា។
ក្រសួងសាធារណការ និងដឹកជញ្ជូន៖ គម្រោងសាងសង់ស្ពានកោះខ្សាច់ទន្លា នឹងឆ្លងកាត់ទន្លេបាសាក់ ដើម្បីតភ្ជាប់តំបន់កោះខ្សាច់ទន្លា ស្ថិតក្នុងឃុំកោះខ្សាច់ទន្លា ស្រុកស្អាង ខេត្តកណ្ដាល ទៅកាន់ផ្លូវជាតិលេខ២១ ដែលជាខ្សែសរសៃឈាមសេដ្ឋកិច្ចដ៏សំខាន់ សម្រាប់ការដឹកជញ្ជូន និងធ្វើចរាចរណ៍សម្រាប់ប្រជាពលរដ្ឋ។
គម្រោងនេះ នឹងសាងសង់ស្ពានប្រវែងប្រមាណ២៨០ម៉ែត្រ និងផ្លូវតភ្ជាប់ពីក្បាលស្ពានប្រវែងប្រមាណ ២៧៦ម៉ែត្រ ។
ដែលនឹងដើរតួនាទីយ៉ាងសំខាន់ក្នុងការពង្រឹងបណ្តាញដឹកជញ្ជូន និងភស្តុភារកម្ម ជាពិសេសវិស័យកសិកម្ម ដោយជួយសម្រួលដល់ការដឹកជញ្ជូនផលិតផលពីតំបន់ផលិតទៅកាន់ផ្សារ.!។
គម្រោងនេះ ត្រូវបានចាត់ទុកថា ជាសមិទ្ធផលហេដ្ឋារចនាសម្ព័ន្ធដ៏មានសារៈសំខាន់ ដែលនឹងបង្កើនជម្រើសដឹកជញ្ជូនគ្រប់រដូវកាល ទាំងរដូវប្រាំង និងរដូវវស្សា កាត់បន្ថយពេលវេលា និងថ្លៃដើមដឹកជញ្ជូន ព្រមទាំងរួមចំណែកជំរុញកំណើនសេដ្ឋកិច្ចក្នុងតំបន់ និងការអភិវឌ្ឍកោះខ្សាច់ទន្លា ឱ្យក្លាយជាមជ្ឈមណ្ឌលកសិកម្ម និងផលិតកម្មកសិកម្មនាពេលអនាគត៕