(កំពង់ឆ្នាំង)៖ តំណាងអយ្យការអមសាលាដំបូងខេត្តកំពង់ឆ្នាំង នៅថ្ងៃទី១៦ ខែឧសភា ឆ្នាំ២០២៦ បានសម្រេចដោះលែង ជនត្រូវចោទម្នាក់ឲ្យត្រឡប់មកផ្ទះវិញ!។
ក្រោយប្រាស់សិទ្ធិការពារខ្លួនបណ្ដាលឲ្យភាគីម្ខាងទៀតស្លាប់ ខណៈជនរងគ្រោះដែលស្លាប់នោះ បានចូលទៅកាប់ជនត្រូវចោទដល់ក្នុងផ្ទះ..!។
ជនត្រូវចោទឈ្មោះ នី រ៉វី ជនជាតិខ្មែរឥស្លាម នៅភូមិច្រករមៀត ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង(ដោះលែង)។
*ហេតុការណ៍អំពើហិង្សានេះ បានកើតឡើង កាលពីយប់ថ្ងៃទី១៣ ខែឧសភា ឆ្នាំ២០២៦ នៅក្នុងផ្ទះរបស់ជនត្រូវចោទ នី រ៉វី។
*ប្រភពបានឲ្យដឹងថា នៅមុនពេលកើតហេតុជនឈ្មោះ សុះ អាលី បានផឹកស៉ីនៅផ្ទះទល់មុខនិងផ្ទះរបស់ឈ្មោះ នី រ៉វី ហើយក៏ទំនាស់ពាក្យសម្ដី ក្រោយមកប្រជាការពារ បានបំបែកកុំឲ្យមានការឈ្លោះប្រកែកគ្នា.!។
ប៉ុន្ដែឈ្មោះ សុះ អាលី បានកាន់ពូថៅដើរចូលទៅកាប់ឈ្មោះ នី រ៉វី ដល់ក្នុងផ្ទះចំក្បាល.ភ្លាមនោះឈ្មោះ នី រ៉វី បានស្ទុះទៅយកពូថៅនៅផ្ទះបាយ មកកាប់បណ្ដាលឲ្យឈ្មោះ សុះ អាលី ស្លាប់ភ្លាមៗនៅកន្លែង.!។
ក្រោយកើតហេតុឈ្មោះ នី រ៉វី ត្រូវបានសមត្ថកិច្ចឃាត់ខ្លួន យកទៅសួរនាំ និងបញ្ជូនទៅសាលាដំបូងខេត្តកំពង់ឆ្នាំង ដើម្បីបន្ដនីតិវិធី។
ការឃាត់ខ្លួននេះ ក៏មានប្រតិកម្មជាបន្ដបន្ទាប់ពីមហាជន នៅលើបណ្ដាញសង្គម អមដោយរូបភាពកូនតូចៗនៅកន្លែងឃុំឃាំង.និងមានការលើកឡើងថា បុរសខាងលើគ្រាន់តែប្រើប្រាស់សិទ្ធិការពារខ្លួន បណ្តាលឱ្យគេស្លាប់តែប៉ុណ្ណោះ.!។
ក្រោយទទួលបានព័ត៌មាននេះ ឧបនាយករដ្ឋមន្ដ្រី កើត រិទ្ធ រដ្ឋមន្ដ្រីក្រសួងយុត្តិធម៌ បានបញ្ជាឲ្យតំណាងអយ្យការអមសាលាដំបូងខេត្តកំពង់ឆ្នាំង ពិនិត្យនិងសិក្សាទិដ្ឋភាពច្បាប់ អង្គហេតុជាក់ស្ដែង ក្នុងករណីបុរសនោះ ពិតជាប្រើប្រាស់សិទ្ធិការពារខ្លួនមែន គឺត្រូវបានធានាដោយច្បាប់។
រហូតដល់រសៀលថ្ងៃទី១៦ ខែឧសភា ឆ្នាំ២០២៦ តំណាងអយ្យការអមសាលាដំបូងខេត្តកំពង់ឆ្នាំង បានសម្រេចដោះលែងជនត្រូវចោទឈ្មោះ នី រ៉វី ឱ្យមកផ្ទះវិញដោយសំអាងថា ប្រើប្រាស់សិទ្ធិការពារខ្លួន៕