ស្ត្រី៤នាក់ត្រូវបានសម្លាប់ កាលពីថ្ងៃអង្គារទី២៦.០៥.២០២៦ នៅក្នុងការវាយប្រហារតាមអាកាសរបស់អ៊ីស្រាអែល ដែលកំណត់គោលដៅលើផ្ទះមួយនៅក្នុងទីក្រុង Maareke ភាគខាងត្បូងប្រទេសលីបង់ ទោះបីជាមានបទឈប់បាញ់ជាបន្តបន្ទាប់ ក៏ដោយ ប្រព័ន្ធផ្សព្វផ្សាយលីបង់បានរាយការណ៍។
សារព័ត៌មានAnadolu។
ទីភ្នាក់ងារសារព័ត៌មានរដ្ឋ NNA បាននិយាយថា ក្រុមការពារជនស៊ីវិលបានរកឃើញសាកសពស្ត្រី៤នាក់ពីគំនរបាក់បែក បន្ទាប់ពីការវាយប្រហាររបស់អ៊ីស្រាអែលនៅក្នុងស្រុក Tyre។
ទីភ្នាក់ងារសារព័ត៌មាន បានបន្ថែមថា ក្រុមជួយសង្គ្រោះកំពុងបន្តប្រតិបត្តិការស្វែងរកគ្រួសារ ដែលបាត់ខ្លួន ដែលគេជឿថាជាប់នៅក្រោមគំនរបាក់បែកនៃអគារដែលត្រូវបានបំផ្លាញ។
អ៊ីស្រាអែល បានបន្តវាយប្រហារលើប្រទេសលីបង់ ទោះបីជាមានបទឈប់បាញ់ដែលសម្របសម្រួលដោយសហរដ្ឋអាមេរិក ដែលបានចូលជាធរមាននៅថ្ងៃទី១៧ខែមេសា និងត្រូវបានពង្រីករយៈពេល៤៥ថ្ងៃចាប់ពីថ្ងៃទី១៧ ខែឧសភាក៏ដោយ។
នៅព្រឹកថ្ងៃអង្គារ ការវាយប្រហាររបស់អ៊ីស្រាអែលលើទីក្រុងKherbet Selem និង Srifa ភាគខាងត្បូងប្រទេសលីបង់ បានសម្លាប់មនុស្សពីរនាក់ រួមទាំងបុគ្គលិកសុខាភិបាលម្នាក់ផងដែរ។
អ៊ីស្រាអែល បានបើកការវាយប្រហារតាមអាកាសកាន់តែខ្លាំងឡើង លើប្រទេសលីបង់ចាប់តាំងពីថ្ងៃទី ២ ខែមីនា និងបានកាន់កាប់ទីក្រុងជាច្រើននៅភាគខាងត្បូងប្រទេសក្នុងអំឡុងពេលវាយលុក។
អាជ្ញាធរលីបង់ បាននិយាយថា ការវាយប្រហាររបស់អ៊ីស្រាអែលបានសម្លាប់មនុស្សជិត៣.២០០នាក់ របួសជាង៩.៦០០ នាក់ និងបានធ្វើឱ្យមនុស្សជាង ១,៦លាននាក់ផ្លាស់ទីលំនៅ៕
