កងឆ្មាំបដិវត្តន៍អ៊ីស្លាមអ៊ីរ៉ង់(IRGC)បាននិយាយនៅព្រឹកថ្ងៃពុធទី០៣.០៦.២០២៦ថា ការវាយប្រហារដែលផ្តោតលើមូលដ្ឋានទ័ពអាមេរិក នៅគុយវ៉ែត ត្រូវបានធ្វើឡើង បន្ទាប់ពីសហរដ្ឋអាមេរិក បានធ្វើការវាយប្រហារនៅជិតច្រកសមុទ្រHormuz និងនៅលើកោះ Qeshm នៅភាគខាងត្បូងអ៊ីរ៉ង់។
សារព័ត៌មានAnadolu។
នៅក្នុងសេចក្តីថ្លែងការណ៍មួយIRGC បាននិយាយថា នាវាដឹកប្រេងអ៊ីរ៉ង់មួយគ្រឿង នៅជិតច្រកសមុទ្រHormuz ត្រូវបានវាយប្រហារ ដោយគ្រាប់ផ្លោងតាមអាកាស នៅយប់ថ្ងៃអង្គារ ដែលបណ្តាលឱ្យខូចខាត ដល់ផ្នែកម៉ាស៊ីនរបស់នាវា។
កងកម្លាំងអាមេរិក ក្រោយមកបានកំណត់គោលដៅប៉មទំនាក់ទំនង ដែលជាកម្មសិទ្ធិរបស់កងឆ្មាំនៅភាគខាងត្បូងកោះ Qeshm។
IRGC បាននិយាយថា កងកម្លាំងអវកាសរបស់ខ្លួនបានធ្វើការវាយប្រហារដោយមីស៊ីល និងយន្តហោះគ្មានមនុស្សបើកដែលកំណត់គោលដៅទីតាំងយោធាអាមេរិក នៅក្នុងតំបន់ រួមទាំងកន្លែងដែលមានទំនាក់ទំនងជាមួយកងនាវាចរទីប្រាំរបស់សហរដ្ឋអាមេរិក។
អ៊ីរ៉ង់បានព្រមានថា ការវាយប្រហារបន្ថែមទៀតប្រឆាំងនឹងអ៊ីរ៉ង់ នឹងបង្កឱ្យមានការឆ្លើយតប”ម៉ឺងម៉ាត់”។
ដោយបន្ថែមថា កងកម្លាំងដែលពាក់ព័ន្ធនឹងសកម្មភាពប្រឆាំងនឹងអ៊ីរ៉ង់នឹងប្រឈមមុខនឹងផលវិបាក។
សេចក្តីថ្លែងការណ៍នេះ បានកើតឡើងភ្លាមៗបន្ទាប់ពីប្រព័ន្ធផ្សព្វផ្សាយរដ្ឋអ៊ីរ៉ង់ IRIB បានរាយការណ៍ពីការផ្ទុះជាច្រើននៅជិតតំបន់ Suza និង Masen នៅលើកោះ Qeshm។
ភាពតានតឹងក្នុងតំបន់ បានកើនឡើងចាប់តាំងពីចុងខែកុម្ភៈ បន្ទាប់ពីសហរដ្ឋអាមេរិក និងអ៊ីស្រាអែលបានបើកការវាយប្រហារតាមអាកាសលើប្រទេសអ៊ីរ៉ង់។
ដោយបានសម្លាប់មនុស្សជាង៣.០០០ នាក់ រួមទាំងមេដឹកនាំជាន់ខ្ពស់ Ayatollah Ali Khamenei និងមេបញ្ជាការយោធាជាន់ខ្ពស់ និងមន្ត្រីរដ្ឋាភិបាលមួយចំនួនផងដែរ៕
