(ភ្នំពេញ)៖ បើទោះបីជាប្រមុខរាជរដ្ឋាភិបាលកម្ពុជា បានដាក់បញ្ជាឱ្យមន្ត្រីពាក់ព័ន្ធ ចុះទប់ស្កាត់និងបង្ក្រាបរាល់ទំនិញផ្សេងៗ ដែលលួចលាក់នាំចូលពីប្រទេសថៃ យ៉ាងណាក៏ដោយ.!។
ប៉ុន្តែគេសង្កេតឃើញថា លោក នូ សុីថា ប្រធាននាយកដ្ឋានបង្ការនិងបង្ក្រាបបទល្មើសរត់ពន្ធ នៃអគ្គនាយកដ្ឋាន គយនិងរដ្ឋាករកម្ពុជា បានរក្សាភាពស្ងៀមស្ងាត់ ពុំអើពើចំពោះបទបញ្ជានេះឡើយ.!។
ជាហេតុនាំឱ្យ សកម្មភាពនៃការរត់ពន្ធទំនិញថៃ.ចូលមកកម្ពុជា ប្រព្រឹត្តទៅយ៉ាងរលូន មកស្តុកទុកនៅរាជធានីភ្នំពេញ ដើម្បីធ្វើការចែងចាយយ៉ាងពេញបន្ទុក និងគ្មានការទប់ស្កាត់.!។
ជាក់ស្តែង ដូចជា(ប្រហិតថៃ)(សរសៃកែងមាន់ថៃ)(សាច់បង្កកថៃ)។
*នេះបើយោងតាម សេចក្ដីប្រកាសព័ត៌មានចំនួន២ផ្សេងគ្នា របស់អយ្យការអមសាលាដំបូងរាជធានីភ្នំពេញ ចុះថ្ងៃទី១៤.០៦.២០២៦ ស្ដីពីការចោទប្រកាន់ជនសង្ស័យ នាំចូល(ប្រហិត.សាច់បង្កក)ពីប្រទេសថៃ ដោយពុំមានការអនុញ្ញាត.!។
*ក្នុងនោះតំណាងអយ្យការ បានចោទប្រកាន់មនុស្សចំនួន៣នាក់ពីបទ៖”ការធ្វើពាណិជ្ជកម្មនូវផលិតផលម្ហូបអាហារដែលមានសភាពប្រែ ប្រួលខូចគុណភាព ឬមានជាតិពុល ឬផលិតផល មិនស្របនឹងលក្ខណៈវិនិច្ឆ័យគុណភាពផ្នែកអតិសុខុមជីវសាស្ត្រ ឬអនាម័យ បទក្លែងបន្លំដើមកំណើតទំនិញ។
និងបទ៖ ការនាំចូលទំនិញដោយគ្មានការអនុញ្ញាត ប្រព្រឹត្តនៅចំណុច ទីតាំងផ្ទះគ្មានលេខ ផ្លូវគ្មានលេខ ភូមិធ្លក សង្កាត់គោករកា ខណ្ឌព្រែកព្នៅ រាជធានីភ្នំពេញ កាលពីថ្ងៃទី១០ ខែមិថុនា ឆ្នាំ២០២៦ តាមបញ្ញត្តិមាត្រា ១៨ និងមាត្រា៦៣ នៃច្បាប់ស្តីពីការគ្រប់គ្រងគុណភាពសុវត្ថិភាពលើផលិតផលទំនិញ និងសេវា មាត្រា៣១ នៃច្បាប់ស្តីពីវិធានដើមកំណើតទំនិញ និងមាត្រា៧៥ នៃច្បាប់ស្តីពីគយ”។
ជនត្រូវចោទទាំង៣នាក់នេះ ទី១.ឈ្មោះ ភុត ប៊ុនហម ភេទ ប្រុសអាយុ៤៦ឆ្នាំ។
២.ឈ្មោះ ហម ម៉ារ៉ាណែត ភេទស្រី អាយុ២៣ឆ្នាំ។
និង៣.ឈ្មោះ ញិន គឹមសួរ ភេទស្រី អាយុ៣៩ឆ្នាំ។
សមត្ថកិច្ច ដកហូតបានវត្ថុតាង.សរសៃកែងមាន់.សាច់បង្កក.មួយចំនួន ដែលបាននាំចូលមកពីប្រទេសថៃ ដោយពុំមានការអនុញ្ញាត និងការបង់ពន្ធត្រឹមត្រូវនោះទេ។
ជាមួយគ្នានេះ តំណាងអយ្យការ ក៏បានចោទប្រកាន់ជនម្នាក់ទៀតឈ្មោះ អ៊ុក សុក្របញ្ញារិទ្ធ ភេទប្រុស អាយុ៤៣ឆ្នាំ ពីបទ៖“ការធ្វើពាណិជ្ជកម្មនូវផលិតផលម្ហូបអាហារ ដែលមានសភាពប្រែប្រួលខូចគុណភាព មានជាតិពុល ឬផលិតផលមិនស្របនឹងលក្ខណៈវិនិច្ឆ័យគុណភាពផ្នែកអតិសុខុមជីវសាស្ត្រ ឬអនាម័យ។
បទ៖ ការប្រព្រឹត្តអំពើក្លែងបន្លំដើមកំណើតទំនិញ។
និងបទ៖ ការនាំចូលទំនិញដោយគ្មានការអនុញ្ញាត”ប្រព្រឹត្តនៅចំណុចទី តាំងផ្ទះគ្មានលេខ លើផ្លូវ៥៩៨ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ កាលពីថ្ងៃទី១០ ខែមិថុនា ឆ្នាំ២០២៦ តាមបញ្ញត្តិមាត្រា១៨ និងមាត្រា៦៣ នៃច្បាប់ស្តីពីការគ្រប់គ្រងគុណភាពសុវត្ថិភាពលើផលិតផល ទំនិញនិងសេវា មាត្រា៣១ នៃច្បាប់ស្តីពីវិធានដើមកំណើតទំនិញ និងមាត្រា៧៥ នៃច្បាប់ស្តីពីគយ”។
ពោលគឺ អាជ្ញាធរចុះបង្ក្រាបទំនិញថៃនៅភ្នំពេញ ដែលមានចម្ងាយរាប់រយគីឡូម៉ែត្រ ពីព្រំដែនថៃបែបនេះ! តើឯណាទៅតួរនាទីនិងកាតព្វកិច្ចនៃការទទួលខុសត្រូវរបស់លោក នូ សុីថា..?។
*ជុំវិញរឿងនេះនៅថ្ងៃទី១៦.០៦.២០២៦”ដើមរាំង”បានព្យាយាមសុំការបំភ្លឺពីលោក សែ សុឃន អ្នកនាំពាក្យអគ្គនាយកដ្ឋាន គយនិងរដ្ឋាករកម្ពុជា តាមរយៈលេខ.087456272 ប៉ុន្តែទូរស័ព្ទរបស់លោកពុំអាចទំនាក់ទំនងបានទេ៕
