តុលាការនៅប្រទេសហូឡង់ បានកាត់ទោសបុរសស៊ីរីអាយុ ៥៨ ឆ្នាំម្នាក់ ឱ្យជាប់ពន្ធនាគារ២៦ឆ្នាំពីបទធ្វើទារុណកម្មនិងរំលោភបំពានលើអ្នកទោសក្នុងអំឡុងសង្គ្រាមស៊ីរី។
ប្រភពពីសារព័ត៌មានAnadolu Agency នៅថ្ងៃទី១៦ខែមិថុនា។
បុរសរូបនេះធ្លាប់បម្រើការជាអ្នកសួរចម្លើយក្នុងកងជីវពលគាំទ្រអតីតប្រធានាធិបតីស៊ីរី Bashar al-Assad។ តុលាការបានរកឃើញថា គាត់បានប្រព្រឹត្តបទល្មើសចំនួន ១៩ ករណី លើជនរងគ្រោះ ៨ នាក់ នៅឆ្នាំ ២០១៣ និង ២០១៤។
ជនរងគ្រោះបានផ្តល់សក្ខីកម្មថា ពួកគេត្រូវបានវាយដំ ឆក់ចរន្តអគ្គិសនី ព្យួរក្បាលចុះក្រោម និងទទួលរងការរំលោភបំពានផ្លូវភេទ។ ស្ត្រីម្នាក់ក៏បានអះអាងថា នាងត្រូវបានគេរំលោភផងដែរ។
តុលាការបានបញ្ជាក់ថា ជនជាប់ចោទបានបង្កការភ័យខ្លាច និងការឈឺចាប់យ៉ាងធ្ងន់ធ្ងរដល់ជនរងគ្រោះ។ ដូច្នេះ គាត់ត្រូវបានផ្តន្ទាទោសឱ្យជាប់ពន្ធនាគារ ២៦ ឆ្នាំ ពីបទឧក្រិដ្ឋកម្មអន្តរជាតិ និងអំពើធ្វើទារុណកម្ម៕
