លោក Jorge Rodriguez ប្រធានរដ្ឋសភា បានមានប្រសាសន៍ថា ចំនួនអ្នកស្លាប់ដោយសារ គ្រោះរញ្ជួយដីដ៏ខ្លាំងក្លា នៅប្រទេសវេណេស៊ុយអេឡាបានកើនឡើងដល់១.៤៥០នាក់ និងរបួសជាង៣.១៥០នាក់។
សារព័ត៌មានTRT នៅថ្ងៃទី២៩.០៦.២០២៦។
នៅក្នុងសុន្ទរកថា តាមទូរទស្សន៍កាលពីថ្ងៃអាទិត្យទី២៨.០៦.២០២៦(ម៉ោងនៅក្នុងតំបន់) លោក Rodriguez បាននិយាយថា មនុស្សជាង៣.១៥០នាក់បានរងរបួស។
ខណៈមនុស្ស១២.៧២១នាក់ត្រូវបានផ្លាស់ទីលំនៅ ឬរងផលប៉ះពាល់ដោយគ្រោះមហន្តរាយនេះ និងអគារចំនួន៧៧៤បានដួលរលំ។
លោកបន្ថែមថា ក្នុងចំណោមអគារដែលដួលរលំទាំង៧៧៤ ក្នុងនោះ១៨៩ អគារ បានដួលរលំទាំងស្រុង!។
លោកបានមានប្រសាសន៍ថា ប្រតិបត្តិការស្វែងរក និងជួយសង្គ្រោះកំពុងបន្ត អ្នកជួយសង្គ្រោះ បុគ្គលិកយោធា មន្ត្រីប៉ូលីស ក្រុមការពារជនស៊ីវិល កាកបាទក្រហម និងអង្គការជាង២៥.០០០នាក់ បានខិតខំជួយសង្គ្រោះជីវិតមនុស្ស ឱ្យបានច្រើនតាមដែលអាចធ្វើទៅបាន។
លោក Rodriguez បាននិយាយថា កម្មករជួយសង្គ្រោះអន្តរជាតិសរុបចំនួន២.៦២៤នាក់ កំពុងសហការគ្នាក្នុងកិច្ចខិតខំប្រឹងប្រែងជួយសង្គ្រោះ រួមជាមួយសត្វឆ្កែចំនួន១៣៧ក្បាល និងរថយន្តជំនួយចំនួន៤៩គ្រឿង។
កាលពីថ្ងៃសៅរ៍ លោកបាននិយាយថា មនុស្សចំនួន១.៤៣០នាក់បានស្លាប់ និង ៣.២៣៨នាក់ផ្សេងទៀតរងរបួស។
អង្គការសហប្រជាជាតិបានប៉ាន់ប្រមាណថា មនុស្សប្រហែល ៥០.០០០នាក់កំពុងបាត់ខ្លួន ដោយសារគ្រោះរញ្ជួយដីមួយនេះ។
សូមជម្រាបថា គ្រោះរញ្ជួយដីកម្រិត៧.២រ៉ិចទ័រ និងកម្រិត៧.៥រ៉ិចទ័រ បានវាយប្រហារប្រទេសវេណេស៊ុយអេឡា ប្រហែល៤០វិនាទី កាលពីល្ងាចថ្ងៃពុធទី២៤.០៦.២០២៦(ម៉ោងនៅក្នុងតំបន់) ត្រូវនឹងព្រឹកថ្ងៃទី២៥.០៦.២០២៦(ម៉ោងនៅកម្ពុជា)។
បណ្ដាលឱ្យអគារជាច្រើនត្រូវដួលរលំសង្កត់មនុស្សស្លាប់ និងបាត់ខ្លួនរាប់ម៉ឺននាក់..!។
*ទន្ទឹមនិងនោះប្រជាជនវេណេស៊ុយអេឡា បានសម្ដែងការឈឺចាប់ ដោយស្ដីបន្ទោសរដ្ឋាភិបាលថា ខ្វះខាតក្រុមអ្នកជួយសង្គ្រោះ ធ្វើឱ្យពួកគេបាត់បង់សមាជិកគ្រួសារ និងបណ្ដាលឱ្យចំនួនអ្នកស្លាប់កើនឡើងយ៉ាងឆាប់រហ័ស។
អ្នកស្រុក បាននាំគ្នាជីកយកកម្ទេចថ្ម ចេញពីអគារអាផាតមិន ដោយខ្លួនឯង ដើម្បីស្វែងរកសាច់ញាតិរបស់ខ្លួន។
បើទោះបីជា ក្រុមសង្គ្រោះមកពីបណ្ដាប្រទេសជិត២០ កំពុងផ្ដល់ជំនួយ.សម្ភារៈពេទ្យ និងកំពុងចល័ត កាត់ដែក កាយកម្ទេចថ្ម ដើម្បីជួយមនុស្ស និងដកហូតយកសាកសពចេញពីអគារបាក់បែកយ៉ាងណាក៏ដោយ។
ប៉ុន្តែដោយសារ គ្រោះមហន្តរាយនេះធំធេងពេក.ពោលគឺ អគារបាក់រលំជាច្រើនកន្លែង មនុស្សជាប់គាំងនៅក្រោមគំនរបាក់បែក រាប់ម៉ឺននាក់ ជាហេតុនាំឱ្យការសង្គ្រោះ មិនអាចគ្រប់គ្រាន់តាមតម្រូវការ៕
