(ភ្នំពេញ)៖ ក្រោយល្បីពេញបណ្ដាញសង្គម ជុំវិញករណីមន្ត្រីសណ្ដាប់ធ្នាប់ខណ្ឌទួលគោក“មិនឱ្យរថយន្តដឹកផ្លែទុរេនចូលផ្ទះ”។
ឥឡូវ រដ្ឋបាលខណ្ឌទួលគោក ប្រកាសឱ្យម្ចាស់ទីតាំងលុបវីដេអូចេញជាបន្ទាន់!រួចធ្វើការសុំទោសជាសាធារណៈ និងព្រមានចាត់វិធានការផ្លូវច្បាប់ដោយគ្មានការលើកលែងទៀតផង.!!។
*នេះបើយោងតាមលិខិតបំភ្លឺ របស់រដ្ឋបាលខណ្ឌទួលគោក ចុះថ្ងៃទី០៤.០៧.២០២៦។
*រដ្ឋបាលខណ្ឌទួលគោក លើកឡើងថា”ករណីសារព័ត៌មានតាមប្រព័ន្ធហ្វេសប៊ុក ដែលបានផ្សព្វផ្សាយរូបភាព សម្លេង និងខ្លឹមសារនៅក្នុងប្រព័ន្ធហ្វេសប៊ុក របស់ខ្លួន ។
ពាក់ព័ន្ធនឹងការឃាត់រថយន្តដឹកទុរេន កាលពីព្រឹកថ្ងៃទី០៤ ខែកក្កដា ឆ្នាំ២០២៦ វេលាម៉ោង៨៖៥០នាទី នៅមុខផ្ទះឈ្មោះ ស្រីអូន លក់ផ្លែឈើ ស្ថិតនៅផ្ទះលេខ០៣ ផ្លូវលេខ២៧២ សង្កាត់ផ្សារដើមគរ ខណ្ឌទួលគោក ដែលមានខ្លឹមសារថា“មិនឱ្យរថយន្តដឹកផ្លែទុរេនចូលផ្ទះ”។
រដ្ឋបាលខណ្ឌទួលគោក អះអាងថា ករណីនេះ គឺមិនពិតដូចការលើកឡើង របស់ម្ចាស់ទីតាំងខាងលើឡើយ ព្រោះទីតាំងនេះ ជាទីតាំងលក់ផ្លែទុរេនបោះដុំតូចចង្អៀត និងយកទ្រូងផ្លូវនិងចិញ្ចើមផ្លូវសាធារណៈ ដើម្បីផ្ទេរទុកដាក់ទំនិញ។
កន្លងមក រដ្ឋបាលខណ្ឌទួលគោក បានចុះអប់រំណែនាំម្ចាស់ទីតាំងខាងលើ ជាច្រើនលើកច្រើនសារមកហើយ។
ប៉ុន្តែម្ចាស់ទីតាំងខាងលើនេះ នៅតែមិនព្រមស្តាប់តាមការណែនាំរបស់អាជ្ញាធរ ជាក់ស្តែងនៅព្រឹកថ្ងៃទី០៤ ខែកក្កដា ឆ្នាំ ២០២៦ វេលាម៉ោង៨៖៥០នាទី កម្លាំងគណៈបញ្ជាការឯកភាពរដ្ឋបាលខណ្ឌ បានចុះល្បាតនិងរៀបចំសណ្តាប់ធ្នាប់តាមដងផ្លូវ លេខ២៧២ ក៏ឃើញរថយន្តដឹកទុរេន កំពុងចតនិងផ្ទេរទំនិញលើទ្រូងផ្លូវ ហើយកម្លាំងសណ្តាប់ធ្នាប់ខណ្ឌ ។
បានចុះឃាត់រថយន្ត ខាងលើយកមកអប់រំណែនាំ នៅទីបញ្ជាការស្រាលរដ្ឋបាលខណ្ឌ (អតីតមជ្ឈមណ្ឌលម៉ុងឌីយ៉ាល់) តែម្ចាស់ទីតាំងមិនសហការ ហើយបែរជាយកកាមេរ៉ាទូរស័ព្ទថតឡាយបង្ហោះក្នុងហ្វេសប៊ុករបស់ខ្លួន និយាយបំផ្លើសខុសពីការពិត ធ្វើការវាយប្រហារដល់ អាជ្ញាធរមានសមត្ថកិច្ច ក្នុងការរៀបចំសណ្តាប់ធ្នាប់ ជុំវិញផ្សារនាគមាស និងផ្សារដើមគ ដែលបណ្តាលឱ្យសាធារណជនមាន ការភាន់ច្រឡំ។
រដ្ឋបាលខណ្ឌទួលគោក បានអំពាវនាវដល់បងប្អូនប្រជាពលរដ្ឋ និងសាធារណជនទាំងអស់ សូមមេត្តាកុំមានការយល់ ច្រលំចំពោះការផ្សព្វផ្សាយព័ត៌មានមិនពិតខាងលើ ព្រោះកន្លងមកនេះ ចាប់តាំងពីថ្ងៃទី១៧ ខែមករា ឆ្នាំ២០២៦។
កម្លាំងគណៈ បញ្ជាការឯកភាពរដ្ឋបាលរាជធានីភ្នំពេញ និងរដ្ឋបាលខណ្ឌទួលគោក បានចុះរៀបចំសណ្តាប់ធ្នាប់នៅផ្លូវលេខ២៣០ ផ្លូវលេខ ២៤៥ ផ្លូវលេខ២១៧ ផ្លូវជុំវិញបរិវេណផ្សារនាគមាស ផ្សារអាសែង និងផ្សារដើមគ រ ជារៀងរាល់ថ្ងៃ ។
ដោយរៀបការ៉ូឡាថ្មីលើ ចិញ្ចើមផ្លូវទាំង៣ខ្សែខាងលើ និងបញ្ឈប់ការលក់ដូរ និងការផ្ទេរទុកដាក់ទំនិញគ្រប់មធ្យោបាយលើទ្រូងផ្លូវ និងចិញ្ចើមផ្លូវសាធារណៈ ដើម្បីរក្សាសណ្តាប់ធ្នាប់ និងរបៀបរៀបរយសាធារណៈ សម្រាប់ប្រជាពលរដ្ឋធ្វើដំណើរថ្មើរជើង និងបញ្ចៀសគ្រោះថ្នាក់ចរាចរណ៍ ផ្សេងៗ។
រដ្ឋបាលខណ្ឌទួលគោក សំណូមពរឱ្យម្ចាស់គណនីផេកហ្វេសប៊ុកឈ្មោះ ស្រី ស៊ីវ លក់បោះដុំទុរេន នៅទីតាំងខាងលើ ដែលបានបង្ហោះផ្សាយព័ត៌មានមិនពិត និងមូលបង្កាច់មកលើសកម្មភាពរបស់អាជ្ញាធរខណ្ឌទួលគោក ក្នុងការរៀបចំសណ្តាប់ ធ្នាប់ជុំវិញផ្សារនាគមាស និងផ្សារដើមគ ឱ្យលុបចេញជាបន្ទាន់ និងធ្វើការសុំទោសជាសាធារណៈ។
ករណីមិនអនុវត្តតាមការ ណែនាំ រដ្ឋបាលខណ្ឌនឹងអនុវត្តវិធានការច្បាប់ ដោយគ្មានការលើកលែងឡើយ៕
