លោក Jorge Rodriguez ប្រធានរដ្ឋសភា បានមានប្រសាសន៍កាលពីថ្ងៃសុក្រទី១០.០៧.២០២៦(ម៉ោងនៅក្នុងតំបន់)ថា ចំនួនអ្នកស្លាប់ដោយសាររញ្ជួយដី២លើក នៅវេណេស៊ុយអេឡា បានកើនឡើងដល់៤.១១៨នាក់ និងរបួសចំនួន១៦.៧៤០នាក់ ខណៈមនុស្សរាប់ពាន់នាក់ទៀត ត្រូវបានផ្លាស់ទីលំនៅ។
សារព័ត៌មានAnadolu។
លោក Rodriguez បាននិយាយថា គ្រួសារចំនួន៨៦.៧៩៤ បានទទួលជំនួយ បន្ទាប់ពីគ្រោះមហន្តរាយមួយនេះ។
លោក បាននិយាយថា មនុស្សចំនួន៦.៤៦២ នាក់ត្រូវបានជួយសង្គ្រោះ ខណៈដែលអគារចំនួន ៨៥៦ត្រូវបានខូចខាត និង១៩០បានដួលរលំ។
លោក Rodriguez បានបន្ថែមថា អាជ្ញាធរ បានចែកចាយអាហារចំនួន ៩.៧៦៦តោន និងទឹកជាង១៣,៩ លានលីត្រ ខណៈដែលអ្នកជំងឺចំនួន ២៩.៩៦៦នាក់បានទទួលការព្យាបាល។
លោក បាននិយាយថា បុគ្គលិកចំនួន ៣០.០៧៦នាក់ និងអ្នកស្ម័គ្រចិត្តចំនួន ២៩.៨៤៣ នាក់ត្រូវបានដាក់ពង្រាយសម្រាប់កិច្ចខិតខំប្រឹងប្រែងសង្គ្រោះ ដោយមានការគាំទ្រពីអ្នកជួយសង្គ្រោះអន្តរជាតិចំនួន៣.៤៥៤ នាក់។
ជំរំបណ្តោះអាសន្នសរុបចំនួន៨៩ ត្រូវបានបង្កើតឡើងសម្រាប់អ្នកស្រុកដែលត្រូវបានផ្លាស់ទីលំនៅ។
ខណៈដែលអាជ្ញាធរ បានកត់ត្រាការរញ្ជួយដីជាបន្តបន្ទាប់ ចំនួន ១.១៧១ ចាប់តាំងពីការរញ្ជួយដីដំបូង។
ការរញ្ជួយដីពីរលើកដែលមានកម្លាំង ៧.២និង ៧.៥រ៉ិចទ័រ បានវាយប្រហារប្រទេសអាមេរិកខាងត្បូងនេះ នៅថ្ងៃទី ២៤ ខែមិថុនា ដែលមានចន្លោះពេល ៣៩ វិនាទីពីគ្នា។
ការរញ្ជួយដីទាំងនេះ បានបង្កការបំផ្លិចបំផ្លាញយ៉ាងទូលំទូលាយ ដែលជំរុញឱ្យមានការឆ្លើយតបផ្នែកមនុស្សធម៌ជាតិ និងអន្តរជាតិទ្រង់ទ្រាយធំ៕
