លោក Jorge Rodriguez ប្រធានរដ្ឋសភា បានឱ្យដឹងថា ចំនួនអ្នកស្លាប់ដោយសាររញ្ជួយដីនៅប្រទេសវេណេស៊ុយអេឡា បើគិតមកដល់ថ្ងៃទី១៣.០៧.២០២៦ បានកើនឡើងដល់៤.៤៩០នាក់ និងរបួសជាង១៦.៧០០នាក់ ខណៈមនុស្សជិត១៩.៦០០នាក់ ត្រូវបានជម្លៀសនិងស្នាក់នៅក្នុងជំរំបណ្ដោះអាសន្ន។
សារព័ត៌មានAnadolu។
លោក Jorge Rodriguez បានចែករំលែកតួរលេខផ្លូវការចុងក្រោយថា មនុស្ស១៦.៧៤០នាក់បានរងរបួសនៅក្នុងគ្រោះមហន្តរាយ នៅថ្ងៃទី២៤ ខែមិថុនា និង៦.៤៦២នាក់ត្រូវបានជួយសង្គ្រោះបន្ទាប់ពីនោះ។
អាជ្ញាធរ បានជួយគ្រួសារចំនួន ១២០.៧៩៤គ្រួសារ និងបានបង្កើតជំរំបណ្ដោះអាសន្នចំនួន១០៨ជំរំ ដែលមានមនុស្ស១៩.៥៨៣នាក់ ខណៈដែលមនុស្ស១៧.៩០៧នាក់នៅតែគ្មានលំនៅដ្ឋានអចិន្ត្រៃយ៍។
គ្រោះរញ្ជួយដីនេះ បានបំផ្លាញអគារចំនួន៨៥៦ខ្នង រួមទាំងអគារចំនួន ១៩០ខ្នងដែលបានដួលរលំ។
ក្រុមសង្គ្រោះបានចែកចាយអាហារចំនួន៩.៩៩៥តោន និងទឹកជាង ១៨.៥លានលីត្រ ខណៈដែលអ្នកជំងឺចំនួន៣២.៤០១នាក់បានទទួលការថែទាំសុខភាព។
ក្រោយកើតមាន គ្រោះមហន្តរាយនេះក្រុមសង្គ្រោះ សរុបទាំងក្នុងស្រុកនិងក្រៅស្រុក ចំនួន31,837នាក់ត្រូវបានដាក់ពង្រាយ ដើម្បីជួយសង្គ្រោះមនុស្សនិងទាញយកសាកសព ចេញពីគំនរបាក់បែកជាបន្តបន្ទាប់។
សូមជម្រាបថា គ្រោះរញ្ជួយដីកម្រិត៧.២រ៉ិចទ័រ និងកម្រិត៧.៥រ៉ិចទ័រ បានវាយប្រហារប្រទេសវេណេស៊ុយអេឡា ផ្ទួនៗគ្នា ប្រហែល៤០វិនាទី កាលពីល្ងាចថ្ងៃពុធទី២៤.០៦.២០២៦(ម៉ោងនៅក្នុងតំបន់) ត្រូវនឹងព្រឹកថ្ងៃទី២៥.០៦.២០២៦(ម៉ោងនៅកម្ពុជា)។
បណ្ដាលឱ្យអគារជាច្រើន ត្រូវដួលរលំសង្កត់មនុស្សស្លាប់ និងបាត់ខ្លួនរាប់ម៉ឺននាក់៕
