(ភ្នំពេញ)៖ សាលាដំបូងរាជធានីភ្នំពេញ កាលពីព្រឹកថ្ងៃទី១៣.០៧,២០២៦ បានប្រកាសសាលក្រមផ្តន្ទាទោសអ្នកស្រី ធី សុវណ្ណថា និងស្វាមីឈ្មោះ ផែ សុវណ្ណារិទ្ធ ដាក់ពន្ធនាគារម្នាក់ៗរយៈពេល៣ឆ្នាំ ព្រមទាំងពិន័យជាសាច់ប្រាក់ម្នាក់ ៦លានរៀល ដែលពាក់ព័ន្ធបទចោទ(ធ្វើឱ្យខូចទឹកចិត្តកងទ័ព)តាមបញ្ញត្តិមាត្រា”៤៧២”នៃក្រមព្រហ្មទណ្ឌដែលតុលាការ បានបញ្ជាក់ថា ប្រព្រឹត្តកាលពីអំឡុងឆ្នាំ២០២៥។
*សំណុំរឿងនេះ មានប្រភពចេញពីការស៊ើបអង្កេតរបស់សមត្ថកិច្ច បន្ទាប់ពីអ្នកស្រី ធី សុវណ្ណថា បានបង្ហោះព័ត៌មាន និងខ្លឹមសារមួយចំនួនលើបណ្តាញសង្គមហ្វេសប៊ុក ដែលអាជ្ញាធរចាត់ទុកថា ជាការបង្កផលប៉ះពាល់ដល់សន្តិសុខជាតិ និងសង្គម ក្នុងអំឡុងពេលស្ថានការណ៍ តានតឹងពាក់ព័ន្ធបញ្ហាព្រំដែនកម្ពុជា-ថៃ។
គួរំលឹកថា កាលពីថ្ងៃទី១៣,១២,២០២៥ កម្លាំងនគរបាលបាននាំខ្លួនអ្នកស្រី ធី សុវណ្ណថា និងស្វាមី ទៅសាលាដំបូងរាជធានីភ្នំពេញ ដើម្បីសាកសួរតាមនីតិវិធីក្រោយពីសមត្ថកិច្ច បានកោះហៅឱ្យចូលបំភ្លឺពាក់ព័ន្ធនឹងការប្រើប្រាស់បណ្តាញសង្គម។
នៅថ្ងៃទី០៩,១២,២០២៥ មន្ត្រីនគរបាលយុត្តិធម៌ នៃការិយាល័យប្រឆាំងបទល្មើសបច្ចេកវិទ្យា បានចេញលិខិតកោះហៅអ្នកស្រី ធី សុវណ្ណថា ឱ្យចូលបំភ្លឺអំពីការបង្ហោះព័ត៌មានរបស់អ្នកស្រី លើបណ្តាញសង្គម។
បន្ទាប់ពីទទួលបានលិខិតកោះហៅអ្នកស្រី បានបន្តបង្ហោះសារជាច្រើនលើគណនីហ្វេសប៊ុកផ្ទាល់ខ្លួន ក្រោយមកត្រូវបានសមត្ថកិច្ចយកមកពិនិត្យក្នុងសំណុំរឿង។
នៅពេលបញ្ចប់ការសាកសួរ កម្លាំងសមត្ថកិច្ចបានកសាងសំណុំរឿងបញ្ជូនទៅតុលាការ ហើយនៅរសៀលថ្ងៃទី១៣.១២,២០២៥ ចៅក្រមសាលាដំបូងរាជធានីភ្នំពេញ បានសម្រេចឃុំខ្លួនអ្នកស្រី ធី សុវណ្ណថា ជាបណ្តោះអាសន្ន នៅពន្ធនាគារខេត្តកំពង់ស្ពឺ ចំណកឯស្វាមីឈ្មោះ ផែ សុវណ្ណារិទ្ធ ត្រូវបានឃុំខ្លួននៅពន្ធនាគារខេត្តកណ្តាល។
ក្រោយដំណើរការជំនុំជម្រះ តុលាការបានប្រកាសសាលក្រមនៅថ្ងៃទី១៣,០៧,២០២៦ សម្រេចផ្តន្ទាទោសជនជាប់ចោទទាំងពីរ ដាក់ពន្ធនាគារម្នាក់ៗ ៣ឆ្នាំនិងពិន័យជាសាច់ប្រាក់ម្នាក់ ៦លានរៀល៕
