(ភ្នំពេញ)៖ លោក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានចេញបញ្ជាដល់កម្លាំងជំនាញឲ្យបើកការស្រាវជ្រាវ តាមចាប់ខ្លួននារីដែលបើកបររថយន្តបង្កហេតុបណ្ដាលឲ្យស្លាប់បុគ្គលិកនៃក្រសួងសាធារណៈការនៅតាមបណ្តោយ ផ្លូវលេខ១០០៣ សង្កាត់ឃ្មួញ ខណ្ឌសែនសុខរាជធានីភ្នំពេញ កាលពីវេលាម៉ោង១១យប់ថ្ងៃទី២៨,០៧,២០២៦។
តាមរយៈគេហទំព័រហ្វេសបុកផ្លូវការរបស់លោកឧត្តមសេនីយ៍ឯក ជួន ណារិន្ទ កាលពីយប់ថ្ងៃទី២៩,០៧,២០២៦ ដែលមានខ្លឹមសារថា ខ្ញុំសូមជម្រាបជូន ក្មួយស្រីឈប់ព្យាយាមរត់គេចខ្លួនទៅ(ចូលសារភាពនៅអង្គភាពណាក៏បាន)ធ្វើដូចកូនខ្លាអញ្ចឹង។ សមត្ថកិច្ចបានបិទច្រកអស់ហើយ(ពេលនេះសមត្ថកិច្ចជំនាញកំពុងតាមចាប់ខ្លួនព្រមទាំងអ្នកឃប់ឃិតជួយលាក់បំពួន)។
ជនរងគ្រោះក្នុងហេតុការណ៍គ្រោះថ្នាក់ចរាចរណ៍ខាងលើមានឈ្មោះ គួច លឹមហាន អាយុ៣៥ឆ្នាំ មានស្រុកកំណើតនៅឃុំខ្ចៅ ស្រុកកងមាស ខេត្តកំពង់ចាម ជាបុគ្គលិកផ្នែកភូគព្ភសាស្ត្រ នៃមន្ទីរពិសោធន៍សំណង់ និងសាធារណៈការ នៃក្រសួងសាធារណការ និងដឹកជញ្ជូន។ ចំណែកអត្តសញ្ញាណនារីរូបស្រស់ជាអ្នកបើកបររថយន្ដឈ្មោះ សាម ម៉ីជូ ភេទស្រី អាយុ២៧ឆ្នាំ អាសយដ្ឋានផ្ទះលេខ៧៨៩K ផ្លូវ១៨០០ ភូមិទួលគោក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
ហេតុការណ៍នេះ បង្កឡើងដោយនារីជាអ្នកបើករថយន្កស៊េរីទំនើបមួយគ្រឿង ម៉ាកAVATAR 11 ពាក់ផ្លាកលេខកម្ពុជា(V.C.8989)បើកវ៉ាជែងចូលទៅផ្លូវម្ខាងទៀត រួចជ្រុលទៅបុកបុរសដែលជាជនរងគ្រោះ បណ្តាលឲ្យស្លាប់ភ្លាមៗ នៅកន្លែងកើតហេតុតែម្តង។ ក្រោយការបង្កហេតុ នារីរូបស្រស់ជាអ្នកបើកបររថយន្តនិងអ្នករួមដំណើរម្នាក់ទៀត បានចេញពីរថយន្តឡើងជិះម៉ូតូផាស់អាប់ចេញពីកន្លែងកើតហេតុបាត់តែម្តង៕
