រដ្ឋាភិបាលឥណ្ឌាកំពុងពិចារណាដាក់ថ្លៃបន្ថែមលើអ្នកប្រើឧស្ម័នចម្អិនអាហារ (LPG) និងឧស្ម័នធម្មជាតិ ដើម្បីផ្តល់មូលនិធិសម្រាប់គម្រោងស្តុកឥន្ធនៈយុទ្ធសាស្ត្រតម្លៃប្រមាណ៤ម៉ឺន២ពាន់លានដុល្លារ។ ផែនការនេះកើតឡើងបន្ទាប់ពីសង្គ្រាមអ៊ីរ៉ង់បានបង្ហាញពីភាពងាយរងគ្រោះនៃខ្សែសង្វាក់ផ្គត់ផ្គង់ថាមពល។
ប្រភពបានឱ្យដឹងថា គម្រោងនេះនឹងពង្រីកការស្តុកឥន្ធនៈពីប្រេងឆៅទៅរួមបញ្ចូលឧស្ម័នធម្មជាតិរាវ (LNG) និងឧស្ម័ន LPG ជាលើកដំបូង ដោយមានគោលដៅស្តុកប្រេងឆៅ និង LNG សម្រាប់ប្រើប្រាស់ប្រហែល ២ ខែ និង LPG ប្រហែល ៦ សប្ដាហ៍។ រដ្ឋាភិបាលរំពឹងថា ការយកថ្លៃបន្ថែមនេះអាចប្រមូលថវិកាបានប្រមាណ ១,៥ ពាន់លានដុល្លារក្នុងមួយឆ្នាំ ខណៈការដំឡើងថ្លៃ LPG អាចបន្ថែមប្រហែល ១៨ រូពី លើស៊ីឡាំងឧស្ម័នស្តង់ដារមួយ៕
