(កណ្ដាល)៖ ថ្ងៃទី០៧ ខែសីហា ឆ្នាំ២០២៦ សាលាដំបូងខេត្តកណ្ដាល បានចេញលិខិតបំភ្លឺជុំវិញចំណាត់ការផ្ដន្ទាទោសជនជាប់ចោទចំនួន១៥នាក់ ពាក់ព័ន្ធនឹងបទល្មើសហិង្សាដោយចេតនា មានស្ថានទម្ងន់ទោស ដែលបណ្ដាលឱ្យមានមនុស្សស្លាប់ និងរងរបួសធ្ងន់.!។
សេចក្តីបំភ្លឺនេះធ្វើឡើង ក្រោយពីមានការរិះគន់ពីសំណាក់សាធារណជនមួយចំនួននៅលើបណ្ដាញសង្គម ពិសេសគណនីហ្វេសប៊ុកផេក “Khmer United News”។
ដែល(Dermrang daily)ទទួលបាននៅថ្ងៃទី០៧ ខែសីហា ឆ្នាំ២០២៦ អ្នកនាំពាក្យសាលាដំបូងខេត្តកណ្តាល បានលេីកឡេីងថា៖ ប៉ុន្មានថ្ងៃកន្លងទៅនេះ មានគណនីហ្វេសប៊ុកផេក (Facebook Page)ឈ្មោះ“Khmer United News”បានបង្ហោះផ្សាយនូវវីឌីអូដែលមានខ្លឹមសារថា(សម័យនេះ ហើយនៅមានតុលាការធននេះទៀត ប្រហែលស្រុកខ្ញុំគ្មានទេយុត្តិធម៌សម្រាប់អ្នកក្រ គួរតែដកតុលាការចេញ)។
អ្នកនាំពាក្យលើកឡើងថា កាលពីថ្ងៃទី៣០ ខែមិថុនា ឆ្នាំ២០២៦ ក្រុមប្រឹក្សាជំនុំជម្រះ នៃសាលាដំបូងខេត្តកណ្តាល បានបើកសវនាការជំនុំជម្រះលើសំណុំរឿងព្រហ្មទណ្ឌលេខ ២៦៨៤ អ.ក ចុះថ្ងៃទី៣១ ខែធ្នូ ឆ្នាំ២០២៥ ដែលមានជនជាប់ចោទចំនួន ១៥នាក់រួមមាន៖
១.ឈ្មោះ លី ហ៊ីណេន (LE HENENG)
២.ឈ្មោះ សុខ ម៉េងសាន
៣.ឈ្មោះ ញ៉ន វី
៤.ឈ្មោះ ចាប ធា
៥.ឈ្មោះ បាន សុតន់
៦.ឈ្មោះ ខុន ភារុណ
៧.ឈ្មោះ ហ៊ុល សីហា
៨.ឈ្មោះ ឃុន វុត្ថា
៩.ឈ្មោះ ឈិន ឈៀក ហៅ ទូច
១០.ឈ្មោះ បូ សុផល
១១.ឈ្មោះ ជា ប៊ុនឡេង ១២.ឈ្មោះ ស៊ិត ចិន
១៣.ឈ្មោះ ភាក់ លីហ្សា
១៤.ឈ្មោះ ឈុន ប៊ុនឈឿត
និងទី១៥.ឈ្មោះ អុន ឆានេត ដែលជាប់ចោទពីបទ អំពេីហិង្សាដោយចេតនាមាន ស្ថានទម្ងន់ទោស (ដោយមានមនុស្សច្រើននាក់)និងបទហិង្សាដោយចេតនាមានស្ថានទម្ងន់ទោស (ដោយសារ មរណភាពនៃជនរងគ្រោះ)ប្រព្រឹត្តនៅចំណុចក្រុមហ៊ុន ជិន យ៉ុន ស្ថិតនៅភូមិព្រែកស៊ឹង សង្កាត់សំពៅពូន ក្រុង សំពៅពូន ខេត្តកណ្តាល កាលពីថ្ងៃទី២៩ ខែធ្នូ ឆ្នាំ២០២៥ តាមបញ្ញត្តិមាត្រា២១៨ ចំណុចទី០៣ និងមាត្រា២២៤ នៃក្រមព្រហ្មទណ្ឌ។
សវនាការនោះ ក្រុមប្រឹក្សាជំនុំជម្រះបានសួរចម្លើយជនជាប់ចោទទាំង ១៥នាក់ ពិនិត្យភស្តុតាង និងបានពិនិត្យផ្ទៀងផ្ទាត់វីឌីអូកាមេរ៉ាសុវត្ថិភាពក្នុងសំណុំរឿងឃើញថា ជនជាប់ចោទបានសហការគ្នាធ្វើសកម្មភាពដោយយកអាវុធ ជាដំបង និងទុយោវាយទៅលើដៃ ជើង ដងខ្លួននិងក្បាលរបស់ជនរងគ្រោះព្រមទាំងបានឈរឡោមព័ទ្ធជនរងគ្រោះដើម្បីរារាំងកុំឱ្យជនរងគ្រោះអាចរត់គេចខ្លួនបាន ដែលជាហេតុបណ្តាលឱ្យជនរងគ្រោះ ១នាក់ស្លាប់បាត់បង់ជីវិត និងជនរងគ្រោះ ០៣នាក់ផ្សេងទៀតរងរបួសធ្ងន់ធ្ងរ។
ក្រោយពេលសួរចម្លើយជនជាប់ចោទទាំងអស់ និងពិនិត្យភស្តុតាងក្នុងសំណុំរឿង ក្រុមប្រឹក្សាជំនុំជម្រះ យល់ឃើញថា មានភស្តុតាងដាក់បន្ទុកនិងពិរុទ្ធភាពគ្រប់គ្រាន់លើជនជាប់ចោទទាំង ១៥នាក់។
ក្រុមប្រឹក្សាជំនុំជម្រះនៃសាលាដំបូងខេត្តកណ្តាល ប្រកាសជាសាធារណៈនូវសាលក្រមព្រហ្មទណ្ឌរលេខ ០៦៨.ត ចុះថ្ងៃទី៣១ ខែកក្កដា ឆ្នាំ២០២៦ ដោយបានសម្រេចផ្តន្ទាទោសជនជាប់ចោទទាំង ១៥នាក់ ដាក់ពន្ធនាគារក្នុងម្នាក់ៗកំណត់រយៈពេល ១៣ឆ្នាំ ពីបទហិង្សាដោយចេតនាមានស្ថានទម្ងន់ទោស (ដោយមានមនុស្សរច្រើននាក់) និងបទ ហិង្សាដោយចេតនាមានស្ថានទម្ងន់ទោស (ដោយសារមរណភាពនៃជនរងគ្រោះ)ប្រព្រឹត្តនៅចំណុចក្រុមហ៊ុន ជិន យ៉ុន ស្ថិតនៅភូមិព្រែកស៊ឹង សង្កាត់សំពៅពូន ក្រុងសំពៅពូន ខេត្តកណ្តាល កាលពីថ្ងៃទី២៩ ខែធ្នូ ឆ្នាំ២០២៥ តាមបញ្ញត្តិមាត្រា២១៨ ចំណុចទី៣ និងមាត្រា២២៤ នៃក្រមព្រហ្មទណ្ឌ៕
