(ភ្នំពេញ)៖ កាលពីរសៀលថ្ងៃទី១២ ខែសីហា ឆ្នាំ២០២៦ នៅវិទ្យាស្ថានជាតិអប់រំ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំ ស្តីពី ការណែនាំបច្ចេកទេសកំណែ និងបែងចែកភារកិច្ចដំណើរការកំណែ ដល់ប្រធាន អនុប្រធានមណ្ឌលកំណែ សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្ដម កែវ ធីវុធ ឧបការី អង្គភាពប្រឆាំងអំពើពុករលួយ និងមន្ត្រីពាក់ព័ន្ធ ប្រធាន អនុប្រធានមណ្ឌលកំណែ គណៈកម្មការអប្បមាទមណ្ឌលកំណែ និងបុគ្គលិកអប់រំនាយកដ្ឋានកិច្ចការប្រឡង។
ក្រសួង បានរៀបចំ មណ្ឌលកំណែចំនួន ១០ មណ្ឌលនៅរាជធានីភ្នំពេញ សម្រាប់ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ ។ ដើម្បីធានាដំណើរការកំណែ ប្រព្រឹត្តទៅដោយរលូន និងមានសុក្រឹតភាព ក្រសួងបានពិនិត្យ និងបំពេញបន្ថែមនូវយន្តការ ការងារមួយចំនួន របស់គណៈកម្មការក្រុមមុខវិជ្ជា ដោយផ្តោតលើ៖(១) ការពិនិត្យកិច្ចការដំបូង (២) ការពិនិត្យនិងផ្ទៀងផ្ទាត់សន្លឹកកិច្ចការបេក្ខជនលើកទី២ (៣) ការកាត់ក្បាលសន្លឹកកិច្ចការបេក្ខជន (៤) ការរៀបចំនិងការចុះអក្សរសម្ងាត់ (៥) ការចុះអក្សរសម្ងាត់និងលេខរៀងបន្ត (៦) ការការបញ្ចេញដុំកិច្ចការ (៧) ការពង្រឹងយន្តការងាររបស់ក្រុមនីមួយៗ និងជំហាននៃការអនុវត្តការងារផងដែរ។
បន្ថែមលើនេះ ក្រសួងបានរៀបចំបំប៉នសមត្ថភាព ប្រធាន អនុប្រធានគណៈកម្មការ ក្រុមមុខវិជ្ជា ដោយផ្តោតលើការបង្វឹកជាក់ស្តែងដោយប្រធានមណ្ឌលកំណែ ដើម្បីជំរុញការយល់ដឹងលើយន្តការការងារ និងជំហានអនុវត្តការងាររបស់គណៈកម្មការក្រុមមុខវិជ្ជា។ រីឯគណៈកម្មការកំណែ ពិសេសអ្នកកែ ត្រូវគោរពឱ្យបាននូវគោលការណ៍ដែលបានកំណត់នៅគ្រប់ដំណាក់កាលការងារ រួមមាន៖ (១) ការកំណត់ល្បឿននៃការកែកិច្ចការបេក្ខជន (២) ការកំណត់ចំនួនដុំកិច្ចការដែលត្រូវកែ (៣) ការប្រជុំណែនាំអំពីអត្រាកំណែនិងរបៀបកែ (៤) ការកែដោយអ្នកកែពីរនាក់ និងការពង្រឹងយន្តការក្នុងការតាមដាន (៥) ការពង្រឹងយ៉ាងម៉ឺងម៉ាត់ការអនុវត្តនូវបទប្បញ្ញត្តិ និងកម្រិតវិន័យចំពោះអ្នកកែជាដើម។
ផ្អែកលើបទពិសោធកន្លងមក ដើម្បីបង្ការកំហុសឆ្គង ការធ្វេសប្រហែស ឬបាតុភាពនានា ក្នុងដំណាក់កាលកំណែ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានក្រើនរំលឹក និងផ្តល់អនុសាសន៍មួយចំនួន រួមមាន៖
១) សូមពង្រឹកតួនាទីរបស់គ្រូកំណែទី២ ក្នុងការផ្ទៀងផ្ទាត់ការកែរបស់គ្រូកំណែទី១ ឡើងវិញឱ្យបានម៉ត់ចត់។
ប្រសិនបើរកឃើញថាមានករណីធ្វេសប្រហែស នឹងមិនអនុញ្ញាតឱ្យចូលរួមក្នុងដំណើរការកែទៀតទេ។
២ ) ផ្ទៀងផ្ទាត់បញ្ជីអវត្ថមាន នឹងសន្លឹកកិច្ចការបេក្ខជន
៣) ហាមដាច់ខាតយកទូរស័ព្ទចូលបន្ទប់កំណែ និងហាមយកអត្រាកំណែចេញពីមណ្ឌលប្រឡង។ សូមដាក់ចេញយន្តការច្បាស់លាស់ និងត្រូវអនុវត្តតឹងរឹង ក្នុងការឆែកឆេរ រាល់ពេលចេញ និងចូលមណ្ឌលកំណែ។
ត្រូវអនុវត្តតឹងរឹងចំពោះការយកទូរស័ព្ទចូលមណ្ឌល គួរប្រមូលទូរស័ព្ទទាំងអស់ដាក់ក្នុងធុងចាក់សោរ និងទុកដាក់ក្នុងបន្ទប់សមរម្យ ហើយសូម កំណត់នីតិវិធីក្នុងការអនុញ្ញាតឱ្យប្រើទូរស័ព្ទក្នុងករណីចាំបាច់។
៤) រៀបចំកន្លែងអង្គុយគ្រូកំណែឱ្យបានត្រឹមត្រូវ ដើម្បីបង្ការការច្រឡំឯកសារគ្នា និងពង្រឹងការសរសេរពិន្ទុឱ្យបានច្បាស់។
៥) សូមរៀបចំនិងពង្រឹងដំណើការកែឱ្យមានប្រសិទ្ធភាព និងច្បាស់លាស់ ដោយគួរកំណត់ពេលវេលាក្នុងការកែ ហើយបើទោះបីបញ្ចប់មុនម៉ោងកំណត់ ក៏មិនអនុញ្ញាតឱ្យចេញទៅផ្ទះមុនដែរ។
៦) បើមានបញ្ហាសុខភាព សូមគ្រូកំណែធ្វើស្វ័យប្រកាស និងត្រូវអនុញ្ញាតឱ្យសុំច្បាប់
៧) អំឡុងពេលកំណែ អាចនឹងមានភ្លៀង ដូច្នេះ សូមណែនាំតាមមណ្ឌលកំណែ ត្រៀមខ្លួនឱ្យបានរួចរាល់នូវសម្ភារៈនិងថង់ផ្លាស្ទីក សម្រាប់ទុកដាក់សន្លឹកកិច្ចការ ឱ្យបានត្រឹមត្រូវ និងសុវត្ថិភាព គួរការពារនិងបង្ការបញ្ហាជាមុនក្នុងករណីមានទឹកលិចមណ្ឌលកំណែ។
ជាថ្មីម្ដងទៀត ឯកឧត្តមបណ្ឌិតសភាចារ្យ ហង់ជួន ណារ៉ុន បានជំរុញលើកទឹកចិត្តឱ្យក្រុមការងារបច្ចេកទេសទាំងអស់បន្តខិតខំប្រឹងប្រែងសហការចែករំលែកបទពិសោធគ្នាដើម្បីជំរុញឱ្យដំណើរការកំណែឆ្នាំនេះ ប្រព្រឹត្តិទៅដោយរលូន និងជោគជ័យ រក្សាបាននូវសុក្រឹតភាព យុត្តិធម៌ និងលទ្ធផលទទួលយកបាន ឆ្លើយតបនឹងការខិតខំប្រឹងប្រែងរៀនសូត្ររបស់បេក្ខជនប្រឡង៕
