(ភ្នំពេញ)៖ ចៅក្រមស៉ើបសួរនៃសាលាដំបូងរាជធានីភ្នំពេញ នៅថ្ងៃទី១៤ ខែសីហា ឆ្នាំ២០២៦ បានសម្រេចឃុំខ្លួនជនត្រូវចោទឈ្មោះ ចិន្តា សុវណ្ណារី ភេទស្រី អាយុ៣១ឆ្នាំ ស្នាក់នៅបុរីML ផ្ទះលេខ១ ផ្លូវលេខ១ ភូមិដូង សង្កាត់ស្ពានថ្ម ខណ្ឌដង្កោ រាជធានីភ្នំពេញ ដាក់ពន្ធនាគារជាបណ្តោះអាសន្នពីបទធ្វើឱ្យខូចទឹកចិត្តកងទ័ព និងប្រមាថចំពោះអ្នករាជការសាធារណៈ ដែលប្រព្រឹត្តនៅបុរីML ផ្ទះលេខ១ ផ្លូវលេខ១ ភូមិដូង សង្កាត់ស្ពានថ្ម ខណ្ឌដង្កោ រាជធានីភ្នំពេញ កាលពីថ្ងៃទី១ ខែសីហា ឆ្នាំ២០២៦ តាមមាត្រា៤៧២ និងមាត្រា ៥០២ នៃក្រមព្រហ្មទណ្ឌ។
គួររំលឹកថា ថ្មីៗនេះស្រ្តីដែលជាជនត្រូវចោទឈ្មោះ ចិន្តា សុវណ្ណារី ជាម្ចាស់ហាងទូរស័ព្ទ បានប្រើប្រាស់ពាក្យសម្តីមិនសមរម្យ និងជេរប្រមាថខ្លាំងៗដល់កងទ័ពដែលកំពុងបំពេញភារកិច្ចការពារជាតិ រឿងទិញទូរស័ព្ទមួយគ្រឿង។
ខណៈការជេរប្រមាថនោះ ត្រូវបានចែកចាយនៅលើបណ្ដាញសង្គម រហូតឈានដល់ឃាត់ខ្លួនរូបនាង ចាត់ការតាមច្បាប់តែម្ដងទៅ៕
