រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា អ៊ីរ៉ង់មិនទាន់សម្រេចចិត្តថា នឹងបន្តការចរចាដោយប្រយោលជាមួយសហរដ្ឋអាមេរិកនៅឡើយទេ។ លោកបញ្ជាក់ថា ការផ្ញើសារតាមរយៈប្រទេសកាតា និងប៉ាគីស្ថាន មិនមានន័យថា ការចរចាបានចាប់ផ្តើមឡើងវិញនោះទេ។
ប្រភពពីសារព័ត៌មានAnadolu Agency នៅថ្ងៃទី ១៥ សីហា ២០២៦។
លោក Araghchi ក៏បានបដិសេធការលើកឡើងថា កិច្ចព្រមព្រៀង Islamabad ដែលមានរយៈពេល ៦០ថ្ងៃ ត្រូវការបន្ត។ លោកថា ៦០ថ្ងៃនោះ គឺជាពេលវេលាសម្រាប់ចរចាដើម្បីឈានទៅរកកិច្ចព្រមព្រៀងចុងក្រោយ មិនមែនជារយៈពេលនៃបទឈប់បាញ់ឡើយ។
អ៊ីរ៉ង់ក៏កំពុងបន្តចរចាជាមួយប្រទេសអូម៉ង់ ប៉ុន្តែការចរចានេះមិនពាក់ព័ន្ធនឹងការចរចាជាមួយអាមេរិកទេ។ វាផ្តោតលើបញ្ហាបច្ចេកទេស ដើម្បីរៀបចំផ្លូវធ្វើដំណើរថ្មីសម្រាប់នាវាឆ្លងកាត់ ច្រកសមុទ្រ Hormuz៕
