ប្រធានាធិបតីអ៊ីរ៉ង់ Masoud Pezeshkian បានអំពាវនាវឱ្យបញ្ចប់សង្គ្រាមជាមួយសហរដ្ឋអាមេរិក ដែលបានអូសបន្លាយអស់រយៈពេលជាច្រើនខែ។ លោកនិយាយថា អ៊ីរ៉ង់គួរតែបញ្ចប់សង្គ្រាមនៅពេលនេះ ព្រោះអ៊ីរ៉ង់កំពុងស្ថិតក្នុង ជំហរដែលមានអំណាច និងកិត្តិយស។
ប្រភពពីសារព័ត៌មានAl Jazeera។
លោក Pezeshkian បានអះអាងថា អាមេរិកបានវាយប្រហារលើសាលារៀន មន្ទីរពេទ្យ និងហេដ្ឋារចនាសម្ព័ន្ធរបស់អ៊ីរ៉ង់ ហើយលោកជឿថា ពិភពលោកបានមើលឃើញអ្វីដែលកើតឡើង និងទទួលស្គាល់ថា អ៊ីរ៉ង់បានឈ្នះក្នុងសង្គ្រាមនេះ។
លោកក៏បានការពារកិច្ចព្រមព្រៀងដែលអ៊ីរ៉ង់ និងអាមេរិកបានព្រមព្រៀងគ្នាកាលពីខែមិថុនា បន្ទាប់ពីអ្នកនយោបាយរឹងត្អឹងមួយចំនួនក្នុងអ៊ីរ៉ង់បានរិះគន់ថា រដ្ឋាភិបាលបានផ្តល់ការសម្បទានច្រើនពេកដល់អាមេរិក។ លោកបាននិយាយថា មិនមានចំណុចណាមួយក្នុងកិច្ចព្រមព្រៀងដែលមានន័យថា អ៊ីរ៉ង់ចុះចាញ់នោះទេ។
ទោះជាយ៉ាងណា មេដឹកនាំយោធាអ៊ីរ៉ង់បានព្រមានថា ប្រទេសនៅតែត្រៀមខ្លួនប្រឆាំងនឹងការគំរាមកំហែងថ្មីពីសត្រូវ។ មេបញ្ជាការកងកម្លាំងប្រដាប់អាវុធអ៊ីរ៉ង់បានបញ្ជាក់ថា កងទ័ពត្រៀមឆ្លើយតបតាមផ្លូវគោក សមុទ្រ អាកាស ការពារដែនអាកាស និងតាមប្រព័ន្ធអ៊ីនធឺណិត ប្រសិនបើមានការគំរាមកំហែងថ្មី៕
