ក្រុមហាម៉ាស់បានអំពាវនាវដល់អ្នកសម្របសម្រួល និងអ្នកធានាកិច្ចព្រមព្រៀងបទឈប់បាញ់ ឱ្យដាក់សម្ពាធជាអតិបរមាលើអ៊ីស្រាអែល ដើម្បីបញ្ឈប់ការវាយប្រហារនៅតំបន់ហ្គាហ្សា និងគោរពតាមកាតព្វកិច្ចក្នុងកិច្ចព្រមព្រៀងបទឈប់បាញ់។
ប្រភពពីសារព័ត៌មានTRT World នៅថ្ងៃទី២ខែកញ្ញា។
ក្រុមនេះបានឱ្យដឹងកាលពីថ្ងៃអង្គារថា ខ្លួនបានទាក់ទងទៅកាន់អ្នកសម្របសម្រួល និងតំណាងក្រុមប្រឹក្សាសន្តិភាពសម្រាប់ហ្គាហ្សា លោក Nikolay Mladenov បន្ទាប់ពីមានការវាយប្រហាររបស់អ៊ីស្រាអែល រួមជាមួយការវាយប្រហារតាមអាកាស ដែលបណ្តាលឱ្យជនជាតិប៉ាឡេស្ទីនស្លាប់ និងរងរបួស។
ហាម៉ាស់បានថ្កោលទោសយ៉ាងខ្លាំងចំពោះការវាយប្រហារនេះ និងអំពាវនាវឱ្យសហគមន៍អន្តរជាតិបង្ហាញជំហរ “ច្បាស់លាស់ និងរឹងមាំ” ក្នុងការថ្កោលទោសការរំលោភបទឈប់បាញ់។
ក្រុមនេះបានព្រមានថា ការបន្តការវាយប្រហារអាចធ្វើឱ្យកិច្ចព្រមព្រៀងបទឈប់បាញ់បរាជ័យ រារាំងកិច្ចខិតខំប្រឹងប្រែងសន្តិភាព និងធ្វើឱ្យស្ថានការណ៍វិលត្រឡប់ទៅរកជម្លោះទ្រង់ទ្រាយធំម្តងទៀត៕
